香港素來集多國美食於一身，無需機票無需出國，亦可以喺呢片土地內食盡環球佳餚。今次要同大家介紹嘅兩間餐廳，一間泰菜一間台菜，大廚都係當地人，煮出嚟食物，自然就更有當地風味！

SAYAM Thai/Bar（銅鑼灣）

裝修雅緻，空間感大，呢間主打地道泰菜嘅餐廳，由泰國廚師班底主理，由串燒、燒烤到咖喱、海鮮等款式一律都有，仲設有酒吧，紅、白酒、啤酒同雞尾酒等都有供應，泰chill了吧？

柚子沙律

先嚟開胃沙律，柚肉嘅份量一啲都唔吝嗇啊。酸酸甜甜嘅柚子肉上，仲有隻鮮甜爽脆嘅大蝦，配埋脆口嘅腰果，口感豐富。

燒魷魚

原條新鮮魷魚上碟當然特別吸引，而且仲暗藏咗師傅唔少心機呢，啲醬料係師傅自家調製㗎！混入泰國多款香草、班蘭葉等，食落香料味濃郁，微辣中更能帶出魷魚嘅鮮香。

椰青雞湯

椰青雞湯係差唔多每枱都必點嘅菜式，以老雞熬嘅湯底，加埋原個新鮮椰青水、青檸、芫荽籽等一齊煲煮，椰奶香味十足，清甜中又帶有微辣同微酸，好多層次，仲有好多雞肉食添。

慢煮羊膝

潮流興慢煮，呢道羊膝要以攝氏65度慢煮成15個鐘咁耐㗎，然後再炆一炆，咁先至可以食到又軟腍又多汁嘅羊膝肉。以紅咖喱、肉桂心、花椒八角等煮成嘅醬汁辛中帶甜，點完羊膝仲好啱用嚟送飯！

泰式燒雞

即叫即燒嘅泰式燒雞特別香口，師傅特地選用約2斤重嘅龍崗雞，以椰汁醃製，慢焗完再燒香，鎖緊晒啲肉汁。仲喺面層搽上泰式風味燒烤醬。難怪燒雞可以保持外脆內嫩嘅口感，辣辣地嘅醬汁酸酸甜甜，份外有泰國風味。

等等HEA （九龍城） 

泰國菜唔係九龍城嘅專利，而入到九龍城都唔一定淨得泰菜選擇嘅。呢間風格現代化，掛滿霓虹燈字句嘅台灣菜餐廳，絕對值得一試。早午晚餐下午茶都有唔同嘅菜式供應，無論係小食、主食定甜品都有，連燒肉都有呢！

台式燒肉

好多人都鍾意自己燒肉自己燒，呢度絕對可以畀大家發揮廚藝小宇宙，識自轉嘅光波爐端燒，少油煙之餘，啲肉仲冇咁易燶，叫返個牛肉拼盤或海鮮拼盤就啱晒！一個牛肉拼盤有4個部位，包括牛舌、牛肩、牛小排同牛胸腹，每款肉嘅肉味同肉質都有分別，有啲肉香濃啲，有啲肉汁多啲……點都滿足到牛魔王。

等一個人可頌

呢個可頌個名好浪漫，查實即係法國火腿牛角包配黑松露炒蛋。超大份餡啊，大份到一個酥脆嘅牛角包都夾唔得晒，睇住啲餡就快要漏出嚟咁嘅狀態，加埋陣陣撲鼻嘅松露香，好誘人。食一份做早餐，即刻有個good morning！

台式紅燒牛肉麵

牛肉麵可以話係台灣菜嘅一大特色，湯底以牛骨，加埋蘿蔔、白胡椒等熬足6個鐘，肉味香濃之餘仲好清甜，飲多幾啖都唔怕鹹。牛肉煮得軟腍，又夠入味。至於麵底，想要索多少少湯嘅話，可以揀刀削麵，韌度適中。

蚵仔滷肉飯

食台菜嘅話，點少得蚵仔同鹵肉飯？呢碗將兩大台灣美食合二為一，啲蚵仔堆到成座小山丘咁嘅蚵仔滷肉飯，淨係賣相已經搶得唔少眼球目光同分數，再望真啲，蚵仔有啲係原味，有啲係酥炸，一菜兩食，味道多變，入口滿滿鮮香，好惹味。每日限量30碗咋。

金牌台灣啤酒蟹

酒迷應該對呢隻蟹幾有興趣，係餐廳嘅得意招牌菜式，加入啤酒煮嘅新鮮蟹，肉質彈牙，酒香滲晒入啲蟹肉到，但又唔會搶去原有嘅鮮甜味，層次變得更豐富。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異