麻辣呢家嘢，辣得刺激之餘，仲會食上癮，餐餐都想搵啲麻辣嘢食。但唔通餐餐都去打個邊爐或者食麻辣燙咩？咁又唔一定嘅。油麻地一條唔起眼嘅巷仔，開咗間主打麻辣雲吞同餃子，一樣止到癮，仲好抵食添！

呢間小店可以話係家庭式經營，幾兄弟姊妹夾份一齊落手落腳做，包餃、煎餃等事事親力親為。小雲吞同餃子都係佢哋每日人手包製，前者有多款口味，的的式式，一啖就食到一粒，店主表示呢個size係希望方便客人，可以一次過試到多啲唔同口味，細細塊嘅雲吞皮仲要係特別訂製添㗎；後者就大隻啲，但就淨係得韭菜一種餡料。

 白菜鮮肉小雲吞

 芹菜鮮肉小雲吞

手工小雲吞嘅口味包括有：白菜鮮肉、韭菜鮮肉、玉米鮮肉、芹菜鮮肉同香菇鮮肉，唔好睇佢哋細細粒，但餡料份量十足㗎。店主話揀呢幾款餡料，主要係由佢哋嘅營養價值出發，例如大白菜可以利腸痛便；含維他命A同粗纖維嘅韭菜就有益肝健胃之效；芹菜祛風利濕、粟米可降低膽固醇、香菇則可美容等。想試單一口味又得，想一次過試晒5款味嘅就可揀「全家福」，廿八蚊就有12隻喇好鬼抵食。

 (左)自殺爆菊辣、(右)BB辣

至於湯底，係每日熬煮兩個鐘嘅豬骨雞湯底，冇加味精，然後再按客人選擇幫碗嘢「加料」——辣椒粉同辣椒油，由BB辣去到自殺爆菊辣多個lvl。自家製辣椒油用咗成二、三十種香料，包括花椒、麻椒、香草、八角等炒成底料，再加入豆板醬，經烹調後再發酵多7-10日先備用，難怪辣得嚟仲好鬼香口，唔會一味得死辣。不過咪話開飯仔唔提你，自殺爆菊辣堅係辣到噴汁，而且仲會停留喺喉嚨同口腔一段時間先至消散，夠晒刺激。

其他菜式個名充滿玩味，好似煎韭菜餃咁，就叫「攞嚟煎 」。即叫即煎嘅，餃皮微脆香口。

大胃王嚟到，或者情侶想甜蜜share食，就可以叫返碗「乜X都有」大碗麵。名副其實，超大碗，30幾個餸乜都有。數得出嘅車仔麵配料，好似蘿蔔、豬紅、豬皮、牛肉、牛丸、雞翼尖等等全部都有，夠晒飽肚。

想加多份小食嘅話，咪「調理鹵味」囉，呢個鹵水拼盤包有豬手、雞翼尖、雞翼、豬腸同豬耳，都幾入味。個鹵水膽由開舖用到而家，仲會隔日又落多隻雞去淆，鹵水味道愈嚟愈香濃。

江記麻辣美食
地址：油麻地砵蘭街6號地鋪

文、相、片：Kar