鍾意食拉麵到極致係點？餐飲集團創辦人李先生，去日本食咗碗拉麵，一試鍾情，就傾咗成個拉麵品牌返嚟香港開店！

 日本店主Kunimoto 先生

灣仔最近有間新開嘅拉麵小店，主打鹽味、醬油拉麵同沾麵，舖仔細細，大約坐到21人左右，但原來舖頭唔簡單，係引入自日本東京葛飾區嘅地區名氣店，4月時更被當地網上媒體 IT media選為「葛飾區人氣拉麵店」第一位。
舖頭大部分食材均由日本直送到港，湯底製作嚴謹，以令李先生極速入坑嘅招牌鹽拉麵為例，一個湯底就用上4種唔同粗幼度同鹹度嘅鹽混合煮成，加入自家製鹽醬，仲要靜待2日先用得。至於其他湯底，亦會用上4種自家製香油，包括葱油、蒜油、雞油同貝柱油配搭，增添層次。麵條亦有3款唔同嘅粗幼度，配搭唔同湯底。

 鹽味拉麵（$ 88）

雞湯為基底嘅湯頭相當清澈，麵條選用粗身款，配料有慢煮脢頭叉燒同慢煮雞胸叉燒，不過味道樸實，感覺清爽，未有太大驚喜。

 醬油拉麵 （$88）

呢個嘅湯底則混合雞湯同魚介湯 ，味道相對較為濃郁，帶有陣陣魚鮮味。

 沾麵（$98）

坊間嘅沾麵多數都較稠身，呢度則走薄身路線。日本店主Kunimoto 先生解釋本身佢都試過製作好濃厚嘅沾麵湯底，但發現客人嘅反應走兩極化。佢想做一碗大眾由細到老都易啲接受嘅沾麵出嚟，試過好多唔同款式後最後得出而家呢款結論。湯底以魚湯加入蒜油調出嘅沾汁，魚香味係幾出嘅，不過食到後段感覺愈食愈鹹，師傅好似重手咗少少喎。

 醬油撈麵（$98）

日式拌麵喺香港算係相對少見，選用煙韌有彈性嘅粗身拉麵，配料有成10款咁多，係幾豐富嘅，仲有魚湯可以邊撈邊加湯，但同沾麵一樣都係偏重口味。

 濃厚拉麵（$118）

香港限定嘅濃厚拉麵，冇改錯名真係濃厚，湯底製作先將雞腳、豬手同豬骨等煮至完全融和，再加入魚乾煲煮，而且必須每隔一段時間就要攪拌一下，大約18個鐘至煮到約30碗份量，所以每日都好快就賣晒。呢款配搭嘅係幼身拉麵同厚切醬油浸五花腩叉燒。

Kunimoto 先生可以話係半途出家，原本從事地產業嘅佢，因為厭倦規律嘅生活，就自薦到一間著名嘅拉麵店學做拉麵，一做就做到而家，並創出自己一套嘅風格。

麵心國もと
地址: 灣仔春園街12號永興樓地下2A號舖

文：Kar
相、片：YanYan