眾所周知，旺角波鞋街嗰邊開咗個新商場，仲講到係港版代官山咁，咁你哋又知唔知裡面有咩嘢食？商場開幕冇耐，暫時係商店為主，餐廳食肆陸陸續續都會開張，例如有西餐呀、漢堡店呀、泰國菜、台灣特飲、火鍋店等，而率先要同大家介紹嘅，就係一間新潮素食店！

呢間素食店早前已經喺中環、尖沙咀等區開舖，引入純素未來漢堡同鐵板素扒等新式素菜，今次嚟到旺角掃街之地，當然要配合下，推返啲街頭小食素食版。鍾意食辣嘅朋友仔就啱晒，有兩款惹味辣小食！

咖喱三寶，包括咗有素魚蛋、蘿蔔同魷魚（雞脾菇製），認真，啲秘製咖喱汁好香口，辣辣地仲有啲脆蒜片，夠晒開胃，啲魚蛋得4粒唔多夠喉。

另一款係再辣啲嘅流口水雞，手工菜嚟呀，用上腐皮、粉皮、素雞、Beyond Meat植物雞、秀珍菇嚟製作，再墊青瓜絲喺底，秀珍菇扮雞肉係幾似呀，加埋啲麻辣醬喺面，喂，原來食素一樣可以好刺激。

另外兩款新素菜都係得旺角呢間分店先有得食嘅，分別係煎釀三寶同焗港素豬扒飯。前者三寶係青紅椒、茄子同冬菇，至於「釀魚肉」就係由釀入以紅蘿蔔蓉、蓮藕、金菇「合扮」嘅，後者賣相吸引，特別係一條條嘅半溶芝士絲，係Daiya 純素芝士嚟，幾香。至於飯底係黃薑飯，健康呀。

當然都唔少得招牌嘅未來純素漢堡啦。

飲品方面，夏天飲沙冰就最爽，鍾意果香嘅就揀菠蘿熱情果杏桃沙冰，鍾意fresh啲嘅就揀青檸薄荷龍舌蘭蜜沙冰啦。

舖頭另外仲有大量健康飲品同產品等售賣，臨近中秋，仲有純素月餅賣添，藍莓果仁味同三色藜麥豆沙味。

Green Common
地址：旺角奶路臣街17 號The FOREST 1 樓110 號鋪
備註：現只售現成產品，餐飲預計要9月11日正式開業才開始提供

文、相：Kar