有咩比冬天食燒肉更正？就係有師傅幫你席前燒好，而且用嘅更係嚴選日本黑毛和牛！銅鑼灣呢間12月新開、以火焰元素為主題嘅日本菜餐廳正正就主打席前西日Fusion燒肉菜式，全開放式吧枱加上霧火效果，驚喜十足。
 

精選岩手縣威士忌黑毛和牛

焰位於銅鑼灣一座商廈嘅18樓，午市同晚市分別供應兩個套餐，包晒前菜、和食、燒肉、甜品等。餐廳嚴選時令日本和牛，今期就係有威士忌和牛之稱嘅岩手縣黑毛和牛！和牛同威士忌有咩關係？原來因為日本東北部盛產威士忌，當地牧場會將威士忌粕、精釀啤酒榨汁殘渣等混入飼料，令和牛嘅油脂香氣更為濃郁。
 

西日Fusion套餐

Dinner Set B（$980/位）

季節精品先付三品

以金漆方盒奉上嘅前菜有蟹膏豆腐、黑魚子煙三文魚蜜瓜同日本紫蕃薯。可以按呢個順序先食帶蟹膏鹹鮮味道嘅蟹膏豆腐，再食鹹甜平衡嘅黑魚子煙三文魚蜜瓜，最後到甜香軟糯嘅日本紫蕃薯，由鹹到甜嘅唔同層次喚醒味蕾。
 

季節刺身三點

刺身會按時令更換，拍攝當日有深海池魚、牡丹蝦同拖羅，牡丹蝦嘅蝦膏相當甘香，拖羅亦非常肥美、入口即溶。
 

火炙和牛刺身配意大利香草汁

選用肉質有彈性嘅西冷部位，捲住香蔥再以輕炙帶出和牛脂香。可以點少少碟邊嘅意大利香草汁，味道帶酸可以平衡油膩感，而且更開胃。
 

（左）鮑魚凍餅，（右）鵝肝茶碗蒸

鮑魚凍餅其實係磯煮鮑魚配搭夢美人米飯，以慢火炆煮嘅鮑魚口感柔嫩彈牙，可以先試原味，然後配搭高湯啫喱同飯一齊食，最後再加上味道最為濃郁嘅肝醬，三重鮮味層次一次滿足。

鵝肝茶碗蒸一開蓋未見鵝肝先聞其香，皆因師傅先將鵝肝煎香再打碎，連同高湯、蛋漿等一齊蒸至僅熟。茶碗蒸口感幼滑，入口後鵝肝香氣慢慢滲出，令人印象深刻。
 

師傅席前烹調及燒肉

炭薰牛舌

師傅會喺席前用火爐即燒，而呢款炭薰牛舌特別在於燒過牛舌後，會放上一塊燒紅嘅日本備長炭，再蓋上玻璃罩。食之前先打開玻璃罩，隨即就會聞到淡淡嘅炭香同肉香。牛舌肉質爽彈，炭薰香氣更特別濃郁。
 

紫蘇二重燒牛肉卷

呢度二重燒嘅意思係指師傅選用肉香濃郁而脂肪較少嘅牛小排，配搭油脂較多嘅和牛他他，希望大家一啖同時食到牛肉脂香同肉味！用紫菜包起同時加入紫蘇葉及黃蘿蔔，方便食同時增添口感層次，紫蘇葉獨特香氣更可以平衡和牛嘅膩度。
 

食物環境融入火焰主題

壽喜汁精選和牛肉眼薄燒

肉質軟嫩嘅肉眼薄片輕炙後會倒上白蘭地燒香，再用自家製壽喜燒醬汁煮過，食落有和牛油花嘅香氣、醬汁嘅鮮甜，再帶少少酒香，味道豐富。
 

季節幽庵燒

幽奄燒即係用上以醬油、味醂、清酒、柑橘類水果混合而成嘅醬汁醃魚肉再燒，而拍攝當日嘅魚肉就係當造嘅秋刀魚。師傅以魚肉包住紫蘇葉，亦可以配搭旁邊嘅秋葵同淮山蓉，進一步令肥美嘅秋刀魚食落更清爽。
 

日本玉子塩漬精選和牛柳粒

特別用蛋黃呈橙紅色、蛋香濃郁嘅日本雞蛋「曉」，鹽漬風乾後再磨成粉末嚟代替一般嘅鹽！和牛牛柳粒外微焦內軟腍，而且肉汁豐富。同玉子鹽、炸蒜片或者烤蒜頭都好夾。
 

海鮮土瓶燒

鰹魚湯用茶壺加上火爐保溫，而海鮮包括蝦、魚肉、菇菌等就會分開煮然後放喺杯裡面，食之前先將熱湯倒落茶杯享用，令海鮮唔會過熟，同時最大保留其鮮味。
 

月見吉列和牛他他飯堡/梅子冷素麵（2選1）

主食有兩款選擇，月見吉列和牛他他飯堡上層係日本蛋黃同和牛他他，下面係日本夢美人米飯、天婦羅碎同洋蔥，撈勻一齊食有齊嫩滑、香脆、軟嫩嘅多重口感，味道就以和牛肉香為主，蛋黃香同洋蔥嘅微辛為輔。而梅子冷素麵就以粉紅色嘅紫蘇素麵配搭梅子醬、紫菜絲及脆米，素麵相當掛汁，食起嚟爽滑酸甜，非常解膩。
 

甜品

好有氣氛！特式雞尾酒

（左）狂哮龍王（$78），（右）救世武神（$68）

如果你對呢兩杯Cocktail嘅名有印象，相信你細個就係《戰鬥陀螺》Fans，皆因餐廳嘅雞尾酒就係以陀螺款式命名。調配雞尾酒嘅時候店員更會即席嗌出口號，然後一邊旋轉酒杯一邊倒出雞尾酒，全場氣氛立即變得好High！狂哮龍王藍本係經典嘅Gin Fizz，加入唔同莓果增加酸甜層次。救世武神靈感就嚟自Mojito，檸檬葉加上青檸汁同White Rum，清新沁涼。
 

焰 

地址：銅鑼灣駱克道487-489號駱克駅18樓

文：Cathy.H
相、片：Yan Yan