唔少人都對食意粉有啲要求，如果你都係的話，尖沙咀最近新開咗一間手工意粉專門店，意大利麵條每日新鮮即製，柔韌彈牙，配合埋時令海鮮及食材烹調，好多菜式都有驚喜！環境方面餐廳樓底高，以酒紅色及金色為主，摩登得嚟又帶有復古感覺，而且光線充足，整體感覺都好舒適。
海膽醬手打意粉（$238）
海膽控必試嘅意粉，先用日式昆布高湯煮意粉，而醬汁係用日本海膽、麵豉及清酒煮成，最後再加上新鮮海膽及沖繩特產海葡萄，前者令到海膽味更濃，後者就可以增加口感及海洋鮮味。而最後加上日本烏魚子增加鹹香感覺，令整體味道更豐富，啖啖都係海膽滋味！
廣島蠔味噌醬意大利飯（$238）
另一個人氣之選係廣島蠔味噌醬意大利飯，用日本廣島蠔、流浮山金蠔、日本煮酒、味醂、香草、日本白味噌熬製十小時而成，將蠔嘅鮮味濃縮喺一個Risotto入面，蠔嘅鮮味於口中大爆發！再加入獅蚶肉提升口感，最後上面加上香煎蜜餞金蠔及法蔥，感覺清新啲，食完口腔內有好濃烈嘅甘味餘韻。
日式醬油漬溏心蛋黃多士
呢款係晚市套餐中嘅其中一道最受歡迎嘅前菜，選用日本長崎縣太陽卵慢煮再取出蛋黃，然後用日本醬油漬24 小時。牛油多士上塗上一層松露mascarpone，再配上法蔥同法國kaviari魚子醬，食完真係幾開胃。
更多【新店直擊】： |
如果係附近嘅上班族，呢度都有供應午市套餐，好似3 courses lunch set都幾抵食，有齊前菜、湯、主菜/意大利麵/Risotto及飲品。前菜推薦呢款慢煮豬腩肉，慢煮八小時，醬汁酸酸甜甜，可以中和豬腩肉嘅油膩感。
法國水晶藍蝦香蒜辣椒意粉（$178）
法國水晶藍蝦香蒜辣椒意粉係其中一道人氣主菜，成味菜好重蒜味，因為炒嘅中途會加入生蒜，而且炒得幾乾身。
法式黑松露蘑菇蓉釀雞卷（$178）
想食吓肉類，法式黑松露蘑菇蓉釀雞卷都幾特別，雞肉卷餡料係黑松露蘑菇蓉，而醬汁用雞殼熬成再濃縮成雞白湯，可以食返雞嘅鮮味～
地址: 尖沙咀金馬倫道33號The Cameron1樓101號舖
文: Yanica
相: Tom Li
