正所謂「春天唔減肥，夏天徒傷悲」，但尖沙咀呢間新店好有可能會成為唔少為食友嘅減肥頭號敵人！皆因經過間店就已經聞到香噴噴薯條味，四款唔同口味都各有特色，最重要係薯條香脆而唔油膩，食下食下唔小心隨時一個人食哂！
呢間Potato Corner嚟自菲律賓，喺美國、澳洲、泰國等地都有分店，總共超過900間，而香港第一間分店就選址尖沙咀。
香脆薯條一共有四個唔同Size杯裝同四款口味，揀最大嘅Tera就可以一次過試哂所有口味！
芝士、奶油洋蔥、燒烤同特辣燒烤四款口味當中以燒烤味最受歡迎，其次就係芝士同奶油洋蔥。唔知係咪因為特辣燒烤真係幾辣下呢？
另外仲有脆薯寶同哈哈笑薯餅，全部都喺分店裡面新鮮即炸。
更多【新店直擊】： |
炸好後會將薯條連同由總公司空運到港嘅味粉倒落樽裡面人手Shake Shake，確保每一條薯條都均勻沾上味粉。
而脆薯寶同哈哈笑薯餅都係一樣做法，同樣香脆惹味。
難怪開咗無耐就已經大排長龍，不過員工手腳都好快，排隊大概等咗5分鐘，落單後再等6分鐘到就食到新鮮Shake Shake薯條啦！
開飯仔試咗芝士同燒烤兩款，芝士味香味十足，食落味道好似芝士波咁。而燒烤味就贏在夠哂鹹香惹味。最抵讃嘅係幼身薯條上面真係有好多味粉，而且完全無越食越油膩嘅感覺。真係建議大家搵多幾個朋友一齊去試，一嚟可以試多啲口味，二嚟唔好畀機會自己一個食哂啊！
Potato Corner
地址：尖沙咀加拿芬道8-12E號嘉芬大廈B座地下G舖
營業時間：11:00-22:00
文、相：Cathy