尋尋覓覓......夜晚食宵去邊好？

想食宵？唔一定要飛到台灣嘅，雖然香港冇啲好有規模嘅大型夜市，但係話哂都係不夜城，有唔少餐廳都開到好夜。如果想喺深宵慰藉吓你空虛嘅肚仔，咪去吓呢幾間試吓囉。

邪惡烤脾墨魚咀　　真滋味美食

Photos by teresahoxd
西環僅餘嘅一間炸物小食店，仲要開到凌晨四點，好多人都會為咗佢特登落嚟買宵，話佢係西環鎮地之寶一啲都不為過。真滋味嘅烤脾就出哂名，廿零蚊一舊皮脆肉嫩，啖啖都係肉。但係除咗烤脾之外，其他小食都好出色，首推墨魚咀，咬落爽口彈牙，啲汁咇哂出嚟，而且有香濃嘅椒鹽味，非常入味。

超新鮮鮑魚　　鍋心粥底火鍋

Photos by benyiu512 & au9
如果想成班豬友狗友坐耐啲，肚仔又比較餓嘅話，咁就嚟鍋心打邊爐啦！每人只要$198就會包7款海鮮+5款肉食+3款蔬果，留意海鮮講緊係蟹、蝦、鮑魚、大蜆、花甲、皇蜆同魚！！啲海鮮都非常新鮮，啲蝦端上嚟嗰陣仲要生猛到跳跳下咁。而火鍋粥底喺煮嘅過程吸收哂海鮮嘅精華，變成金黃色，味道鮮甜香濃，係一間值得嚟嘅良心鋪頭！

藝術品咁嘅甜品　　小糖鈕甜品專門店

Photos by sushixd
據聞老闆係半島同文華出身，所以做嘅甜品特別精緻，十足一件件藝術品咁。建議order一個大糖紐精選系列，包咗五款精選甜品（白朱古力忌廉、富士蘋果撻、冰鎮玫瑰士多啤梨燉蛋、意式熱情果芭菲、蘑菇甜品）同三款神秘甜品，八款甜品埋單都係200蚊，算係好抵。首推冰鎮玫瑰士多啤梨燉蛋，面頭有個薄脆做嘅玫瑰花，裡面就係含荔枝果肉嘅燉蛋，呈淡淡粉紅色，靚到唔忍心食咗佢。不過留意佢只係開至凌晨，所以要試就早啲去啦。

深宵大學食堂　　可可

Photos by jennyyi1222 & 幸福表姐
又一間喺西環嘅餐廳，因為開至凌晨四點，而且飯麵小食糖水樣樣有，所以附近好多學生都鍾意喺度食宵。夜晚嚟到，梗係要試吓啲小食，首推炸雲吞，雖然炸皮略嫌太多，但香口酥化，餡料（蝦同豬肉）份量亦足，配埋沙律醬食更好味。除此之外，其他小食如蠔餅、魚腐、咖哩魚蛋豬皮等都好惹味，值得一試。

Ladies' Night好去處　　Mini Club

Photos by poortravellers & JobieLee
如果夜晚想搵個地方同姊妹們慢慢把酒談心嘅話，Mini Club就啱哂啦！呢度唔單止有酒有小食有飯，而且裝修格調一流，十足去咗個小巴黎咁。'What the duck' cocktail 係呢到必點之選，鴨仔造型好得意，而且隔離仲有個小浴缸，裝著滿瀉嘅泡泡，絕對係影上網呃like機會。野食方面，炸物拼盤、香芒雞肉薄餅、海鮮拼盤等都可以一試。

文：Tuen

隨時接收最新資訊
讚好OpenRice專頁！