平時做嘢咁辛苦，係時候補返下對自己好啲啦。荃灣呢間小店主打自家燉湯同小菜，燉湯湯膽每日用大量雞同豬肉熬製，再加唔同食材燉成一盅盅有唔同功效嘅燉湯同藥膳湯水。女士們想滋補養顏得，非常時期想清熱潤肺亦得，得咗！
 

壹盅湯位於荃灣曹公坊，負責人之一Simon有十幾年酒店中菜廚師經驗，對湯嘅認識非常深，見到坊間有唔少燉湯主題餐廳，希望自己可以將燉湯做得更好，就同拍檔開咗呢間小店。
 

燉湯要好飲，湯膽就非常重要。每朝都要用20隻農場雞、20kg嘅豬肉，再加金華火腿熬6小時去做湯膽。每盅燉湯就用多款藥材同食材，加上湯膽燉至少1.5小時。
 

招牌壹盅湯-鮑魚花膠螺片燉雞（$78）

招牌燉湯亦係最受歡迎嘅就係呢盅鮑魚花膠螺片燉雞，每盅都有齊鮑魚、花膠、螺片、雞肉、排骨、杞子、圓肉，有滋補養顏嘅功效，而且有花膠可以補充骨膠原，特別推介畀女士們！燉湯味道清甜而且唔油膩，鮑魚嘅鮮味仲帶出肉嘅甜味。
 

海底椰川貝南北杏燉鱷魚肉（$62）

藥膳湯水亦有多款選擇，呢款海底椰川貝南北杏燉鱷魚肉就有助止咳化痰、清熱潤肺，適合所有人享用。飲落南北杏同海底椰香氣都幾突出，味道甘甜易入口。
 

 

蒜蓉開邊蝦籠仔蒸飯（$58）

除咗燉湯，小店仲有多款小菜同蒸飯，好似呢份蒜蓉開邊蝦籠仔蒸飯仲用咗荷葉，一打開蓋就聞到淡淡荷葉清香！蝦就每日喺附近嘅香車街街市揀新鮮貨，所以肉質特別鮮甜彈牙，配蒜蓉同豉油真係無得輸。
 

砂鍋川香蘿蔔牛腩（$68，配白飯）

川香蘿蔔牛腩以方便保溫嘅砂鍋上枱，川式醬汁用多款香料例如八角、辣椒、花椒製作，特別改良至香港人普遍可以接受嘅辣度。牛坑腩軟腍入味，蘿蔔清甜多汁，加埋香辣醬汁真係送飯一流。
 

陳皮燉雪梨（$28）

最後仲有甜品食！選用五年嘅新會陳皮，梨肉同燉湯入口都相當甘香清甜。而陳皮燉雪梨亦有幫助化痰潤肺嘅功效，食埋成餐先夠滋潤呀。
 

壹盅湯
地址：荃灣曹公坊11-15號德仁樓三期地下3號舖

文：Cathy
相、片：Tom Li