食餃子都講究儀式感？觀塘呢間新開嘅手工餃子店就特別將湯底以金壺奉上，想食幾多自己倒又好啱打卡！餃子每日新鮮製作，11款常設加不定期推出嘅期間限定口味任揀，大大粒漲卜卜。湯底就有豚骨湯同是日濃湯兩款，特別推介香濃微甜嘅南瓜湯！
 

木金餃子製作所位於觀塘，係同一棟工廈當中Call Me Chef嘅姐妹店，主打手工餃子，每粒都係即日新鮮包唔留過夜，素菜餃為免食材出水更係即叫即包！一份八隻餃子可以揀兩款唔同口味，留意返湯餃為咗保持最佳口感只設堂食，想買走就暫時只有盒裝生餃子。
 

大大隻鳳城蝦蝦餃 拼 黑松露芝士豚肉餃（奢華口味$88/8隻）

（左）大大隻鳳城蝦蝦餃，（右）黑松露芝士豚肉餃

鳳城蝦蝦餃顧名思義，靈感係嚟自飲茶食到嘅鳳城蝦餃，選用肉質爽嫩嘅中蝦切粒，加上木耳、胡蘿蔔等製作餡料，咬落啖啖都有彈牙蝦肉！而黑松露芝士豚肉餃一入口會先食到香濃嘅黑松露香，之後就係巴馬臣等芝士嘅奶香同豬肉肉味，味道平衡。餃子皮厚薄適中又夠滑，每粒餃子都相當飽滿。
 

自家熬煮嘅豚骨湯味道清甜，有豬骨香但唔會太油膩，可以話係最百搭嘅湯底。亦因為豚骨湯味道較淡，所以隨湯附上特色蔥油甜豉油，用油爆香紅蔥頭等香料再混合甜豉油，點少少就夠香口。
 

 

臭臭香荽豚肉餃 拼 有營纖維素菜餃（經典口味$68/8隻）

（左）臭臭香荽豚肉餃，（右）有營纖維素菜餃

芫荽黨黨員可以一試佢哋嘅香荽豚肉餃，芫荽味道突出而且夠Juicy，原來師傅每日到街市買新鮮豬肉，肥瘦比例約為2:8，令肉餡食落唔會成口油又或者太乾。而素菜餃就最啱跑素嘅朋友，裡面有新鮮節瓜、沙葛、木耳、紅蘿蔔，色彩繽紛，粒粒口感爽脆過癮。
 

讚歧烏冬（+$12）

餐廳負責人指因為餃子都夠大粒，其實大部分男士食一份八粒都夠飽，反而係女士會加多份烏冬然後兩個人Share嚟食！烏冬口感彈牙，配搭濃湯夠掛湯。
 

（左）南瓜濃湯，（右）紅菜頭蕃茄忌廉湯

濃湯口味不定期更換，首輪係金黃色嘅南瓜濃湯，幼滑Creamy之餘又有天然嘅南瓜甜味，建議可以配有黑松露或者芝士等口味比較濃郁嘅餃子。
 

之後即將推出嘅濃湯會係粉紅色嘅紅菜頭蕃茄忌廉湯！入口先有紅菜頭嘅清甜，之後就係蕃茄嘅微酸，味道醒胃。
 

無骨明太子雞翼（$38/3隻）

餐廳專注於餃子，小食選擇唔多。無骨明太子雞翼外皮香脆，裡面釀滿鹹香微辣嘅明太子，幾惹味。
 

白桃烏龍冷泡茶（$14）

飲品有冷泡茶、日本梳打等，白桃烏龍冷泡茶有淡淡白桃甜味，飲落以烏龍清香為主，相當解渴。
 

木金餃子製作所
地址：觀塘開源道60號駱駝漆大廈三座6樓E2室

文、相：Cathy.H