日本人氣冬甩品牌「Mister Donut」終於登港喇～香港1號店將於10月26日（本週六）正式開幕，現場除咗有人氣「Pon de Ring波堤」，仲有酵母冬甩、朱古力冬甩、鬆脆冬甩同法式扭紋共5大款式，開飯仔帶你率先睇！

日本團隊新鮮製作20款口味

由日本Duskin株式會社持有主要特許經營權嘅Mister Donut喺美國發跡，喺日本、台灣、印尼、菲律賓、泰國同新加坡共6個地區開設分店，更喺日本全國坐擁超過1,000間店舖𠻹。今次登陸香港，同樣由日本團隊親自把關出品質素，每日新鮮手工製作，填滿整個繽紛冬甩櫃。

香港1號店選址人流集中嘅尖沙咀

香港店目前供應5大款式共20種口味，以原味、朱古力、士多啤梨同黃金蜜糖味為主，價錢為$19-$20/個。同其他分店一樣，新店沿用獨特配方製成各款冬甩、波堤麵糰，希望做出最貼近日本嘅味道。品牌嘅波堤創作者Masaaki Nakamura先生表示：「能夠畀香港顧客品嚐到Pon de Ring，我覺得好開心。未來計劃會使用日本產抹茶製作冬甩，並推出香港原創產品。」

品牌波堤創作人Masaaki Nakamura先生

開幕初期，每位顧客每次交易限購10件冬甩（波堤系列限購最多4件）

皇牌煙韌Q彈波堤、經典冬甩

品牌其中一個人氣招牌就係好似花花形狀嘅波堤，Masaaki Nakamura先生表示同日本團隊花上1年時間研發同準備，再於2003年公開發售，其後旋即成為超人氣包款，更係多間分店嘅最熱賣皇牌。香港店有4款口味，士多啤梨同朱古力味表面均有脆皮朱古力，搭配煙韌Q彈波堤口感，好有嚼口。

原味、黃金蜜糖波堤（$19/件）｜士多啤梨、邪惡朱古力波堤（$20/件）

口感煙韌彈牙，食落好似麻糬咁Q彈

鍾意食圓碌碌冬甩嘅話，呢度一樣滿足到你。冬甩分別以原味同朱古力酵母麵糰做基底，配上唔同口味嘅配搭任君選擇。酵母冬甩係介乎麵包同蛋糕嘅質感，鬆軟同時帶濕潤口感。朱古力控推介要試吓朱古力冬甩系列，士多啤梨同黃金脆粒款式幾吸引，前者酸甜開胃，後者口感突出，同冬甩幾夾㗎。

左：黃金脆粒朱古力冬甩（$20）｜右：士多啤梨朱古力冬甩（$20）

特別款式：法式扭紋、忌廉冬甩

一場嚟到梗係試多幾款啦～法式扭紋冬甩打破咗「冬甩一定要圓形」嘅固有印象，以圓圈扭紋登場，造型好似一個小花環。味道、口感同冬甩大同小異，不過中間多咗層順滑天使忌廉或吉士內餡，層次更豐富。

左：法式粉紅吉士扭紋（$20）｜右：法式天使忌廉扭紋（$20）

為Cream迷度身訂造嘅忌廉冬甩，賣相脹卜卜，表面沾滿糖砂糖勁邪惡啊！鬆軟麵包填滿天使奶油、吉士忌廉，每一啖都軟綿鬆軟，過吓口癮都唔錯。

吉士忌廉冬甩（$20）

Mister Donut
地址：尖沙咀河內道18號K11購物藝術館B1樓B103A號舖

文：Sharon
相、片：Yan Yan
剪：Tony