終於到咗可以食煲仔飯嘅日子喇！一打開煲蓋係滿滿嘅飯焦香，真係見到都流晒口水。今次介紹十間畀大家，有多年歷史嘅傳統名店，亦有唔少創新fusion系列，總有一間啱你食！
麵包爐焗飯 永合成馳名煲仔飯
講到食煲仔飯，飯嘅質素當然都係重點！呢間超過40年歷史嘅食店以火力夠晒平均嘅麵包爐煲仔飯而聞名，飯粒粒分明。尤其窩蛋牛肉飯特別出色，牛肉切成小粒，入味又無筋，撈埋蛋黃食真係一流！溫提店舖只開午市，星期日同公眾假期都唔開㗎。
圖: 米芝蓮煲仔飯 坤記煲仔小菜
超人氣嘅老字號煲仔飯，更連續四年獲得米芝蓮推介，想食就預咗一定要排隊！老闆特意搵成本更貴嘅瓷煲，又以火山石代替炭火，飯焦平均分佈成個鍋底，充滿焦香～招牌白鱔滑雞煲仔飯，白鱔新鮮肥美，滑雞又嫩滑，加埋秘製甜豉油真係無得輸。
圖: joyceclt
即叫即煲 祥囍煲仔小廚 
筲箕灣區煲仔飯名店，唔少人都特登慕名而去，餐廳每個煲仔飯都係即叫即煲，真係慢工出細活，所以要有心理準備等嘅時間比較耐呀。招牌臘味蝦乾飯加入切臘肉、臘腸、潤腸以及加上大大條蝦乾，入口有滿滿臘味香氣外，蝦乾亦增添層次感。
圖: sissyfoodie
經典臘味排骨飯 嚐囍煲仔小菜
又一間米芝蓮推介嘅煲仔飯，煲仔飯以新舊泰國米同豬油加上炭火煲成，又邊有可能唔香！臘味排骨飯必試，臘味帶有酒香，搭配排骨再注入靈魂嘅甜豉油，每一啖都有驚喜。
圖: FEEDYOURSOUL
首創海鮮煲仔飯 銓滿記餐廳小廚
睇咗幾間傳統煲仔飯，開始介紹啲新派嘅畀大家揀～呢間以海鮮煲仔飯做主打，可以自選大鱔、黃鱔、蟶子、扇貝同海蝦等配料，蒜蓉扇貝粉絲煲仔飯，扇貝好大粒，而且海鮮嘅鮮味滲晒入飯度呀。
圖: 溫泉蛋陳皮和牛肉餅煲仔飯 四季芬芳
中環蛇王芬嘅副線品牌，除咗中菜仲有煲仔飯食，如奄仔蟹土魷肉餅煲仔飯、枝竹羊腩煲仔飯等，特別推介溫泉蛋陳皮和牛肉餅煲仔飯，將陳皮加入和牛肉餅中，肉餅軟腍，帶有陣陣陳皮香。
自家製豬油煲仔飯 江湖小棧
呢度嘅煲仔飯上枱時會配上一樽豉油同豬油，飯底好香好脆卜卜，邪惡又好味！配料方面有臘味系列同鹹魚系列等，前者油香豐富，後者就係惹味之選。
圖: 芝士煲仔飯 榮記茶餐室
呢間茶記除咗出名煲仔沙嗲牛肉麵，佢嘅創意芝士煲仔飯一樣咁出名，食落感覺有啲似西式燉飯，芝士配埋飯焦食落又幾夾。除咗呢款都仲有傳統煲仔飯同四川麻辣煲仔飯揀。
圖: 超過二十款煲仔飯 砂煲兄弟
呢間新派煲仔飯，勝就勝在夠晒多選擇，唔止有傳統款式，仲有多款特色口味。如鵝肝慢煮牛柳煲仔飯、黑松露蟹肉海膽煲仔飯同三椒酸菜龍躉球煲仔飯等，啱晒鍾意嚐鮮嘅朋友仔。
圖: 松葉蟹甲羅盛煲仔飯 Nonsense
係咪估唔到日式西餐都有得食煲仔飯？呢間Fusion酒吧餐廳主打各款創意菜式，招牌北海道松葉蟹甲羅盛·大蝦·海鮮日式煲仔飯，以珍珠米代替普通米飯，加入特製醬汁同煲，配料有多款海鮮如大蝦、蠔、青口、帶子、魷魚同北海道松葉蟹甲羅盛，蟹膏味道相當香濃～
圖: margaret20
文: Yanica
