雖然珍珠奶茶已經流行咗好耐，但好多人依然都係對佢情有獨鍾。不過飲嚟飲去都係黑色嘅珍珠，又似乎有啲悶。元朗有間仲係試業緊嘅台式飲品店，就研製咗6、7款花果茶系嘅珍珠，視覺同味覺一樣咁享受！

(左)火龍果珍珠、(右)百香果珍珠

(左)玫瑰珍珠、(右)桂花珍珠

(左)芋頭珍珠、(右)baileys珍珠

黑珍珠

呢間茶飲店嘅珍珠粒粒都係自家製嘅，包括花系嘅桂花珍珠、玫瑰珍珠；果系嘅火龍果珍珠、百香果珍珠，另外仲有芋頭珍珠同baileys珍珠，煙煙韌韌幾有咬口。粒粒都真材實料，好似火龍果珍珠咁，搓粉嘅時候真係連埋一嚿嚿新鮮火龍果肉一齊整，每粒都會見到火龍果籽呀，仲好香果味添。而晶瑩嘅玫瑰珍珠，仲可以見到裡面透出嚟嘅玫瑰花瓣。老闆們專誠過台灣學藝一個月返嚟㗎，粉糰用機器攪完之後人手再搓，咁先可以感受到粉糰嘅溫度同濕度，控制珍珠嘅煙韌度。搓好就放入另一部機度切返珍珠圓粒形出嚟，煮熟備用。功夫繁多，所以每日供應數量有限，賣晒就冇喇。

根據開飯仔現場觀察，最好賣嘅就係芋頭珍珠同baileys珍珠。因為好多人都嗌double芋頭奶呀！即係芋頭珍珠加芋頭奶，芋頭味好香，裡面仲食到一粒粒芋頭添。

至於其他果茶，同坊間唔同嘅係，呢度每杯茶就用一個茶包，用萃茶方式處理，再加人手搖勻之後，原個茶包會放埋入杯度，令茶味更香更突出。茶嘅種類都唔少，包括有紅茶、綠茶、焙茶、烏龍茶等等，茶包係台灣直送嘅，喺入包之前已經做好調配，例如果茶嘅茶包，茶葉一早混埋果乾咁去整喇。

(左)黃金果茶、(右)夢幻果茶，珍珠仲可以兩溝

黃金果茶係由士多啤梨、蘋果等較甜嘅生果去製作，而夢幻果茶就係雜莓之類，味道較酸，兩款都各有捧場客。

至於嫩仙草奶凍，製作上相對簡單，就仙草加奶加黑糖，但已經好香甜，飲之前記得要攬勻呀。

飲品嘅甜度同冰量都可以選擇，但因為未有熱飲杯嘅關係，暫時未有熱飲提供，如果真係唔想飲咁凍嘅，叫住走冰先啦。至於SIZE，就得一個700Ml嘅，都幾大杯，飲完再食埋啲珍珠係會有飽嘅感覺。BTW，想飲嘅朋友，最好有定心理準備，每杯即叫即製，要多少少時間等呀。

春風三月
地址：元朗教育路1號元朗千色匯地下G34號舖

文、相：Kar