離開飯熱店大賞頒獎禮嘅日子愈來愈近喇，係咪好心急想知道心水餐廳究竟有冇得獎呢？以下呢十間長勝將軍餐廳，年年都係以大熱姿態攞獎，直情攞到手軟！而且十間有九間都係港式餐廳，雖然每年都有唔少過江龍殺入香港，或者日韓台飲食潮流，但係作為香港人，始終都心繫最有本土風味嘅地道美食！即刻睇睇呢幾間大家都好熟悉嘅餐廳，估吓今年會唔會再度冧莊？
澳洲牛奶公司 (連續9年獲最優秀開飯港式茶餐廳)
圖：馳名中外嘅「光速餐」雖然有人讚有人彈，但無損火腿炒蛋嘅魅力嘅！蛋味濃又香滑，即使坊間有好多模仿者，龍頭地位仍然屹立不倒！
勝香園 (連續9年獲最優秀中西區開飯熱店)
圖：中環歌賦街有兩大條人龍，其中一條就係屬於佢！蕃茄牛肉通同檸蜜脆脆係必點名物，茄湯真係好味到會掛住，唔怪得大熱天時都不乏捧場客。
肥姐小食店 (連續8年獲最優秀開飯小食店)
圖：最有代表性嘅港式滷味，一定係肥姐！每次來掃街都一定要食個「大皇牌」，水準穩定永無失手，墨魚生腸爽口彈牙，加埋甜醬芥辣超惹味，抵佢受歡迎嘅。
維記咖啡粉麵 (連續8年獲最優秀開飯粥粉麵店)
圖：CallyCht
深水埗名店之一，以豬膶麵打響名堂，豬膶份量十足，質感爽口，帶少許薑味，鍾意食內臟嘅朋友無理由冇食過！咖咉西多士都係鎮店之寶，唔好錯過呀。
九記牛腩 (連續８年獲最優秀開飯粥粉麵店)
圖：panhmc
曾獲米芝蓮推介、服務好有態度嘅九記，即使打到見報都仍然人氣高企，咖喱同清湯牛腩賣到街知巷聞，牛腩腍滑入味，識食一定食伊麵。
公和荳品廠 (連續７年獲最優秀開飯小食店)
圖：米芝蓮百年豆品老店，食物同環境都富有香港傳統風味，豆腐製品真材實料，豆腐、豆漿同豆卜至腐皮、嚮鈴、枝竹等等都係招牌食品，豆味同人情味同樣濃厚。
時新快餐店 (連續5年獲最優秀九龍城開飯熱店)
圖：一提起港式漢堡，點會係麥當勞，第一間諗起時新！舊式快餐店格局懷舊，手打漢堡樸實無華，啖啖牛肉加半溶芝士，童年回憶返晒嚟！
嘉樂冰廳 (連續5年獲最優秀荃灣/葵青區開飯熱店)
圖：想當年餐廳未識玩浮誇自暴自棄邪惡食物，呢間茶餐廳已經開始賣特大奄列，用4隻雞蛋製成，份量足夠兩人食，其他港式茶餐廳食物亦大件夾抵食。
金華冰廳 (連續3年最優秀旺角開飯熱店)
圖：香港美食除咗有蛋撻，唔好忘記菠蘿包！呢度嘅菠蘿包一出爐就會自然有人搶購，酥皮鬆化，麵包紮實香甜，識食梗係要加塊牛油啦。
Amber (連續3年獲最優秀開飯法國菜)
圖：Suetyee
全港唯一一間全球及全亞洲50最佳餐廳、米芝蓮二星殊榮，亦當然係大熱門之一！菜式精緻細膩，有創意之餘，食材、煮法亦相當講究，絕對係法國菜最佳代表。
圖：char108
最後，有一間餐廳多年來一直入圍，但每次都同大獎擦肩而過，只差一點點就得獎，絕對係滄海遺珠！唔緊要，我哋知道呢間餐廳都相當有實力，水準絕對唔差，足料嘅即叫即煎蛋牛治，喺唔少人心目中已經係最好！今年都要加油呀，開飯仔頒個我最喜愛大獎支持你！
文：Perrins