無論你係咪無印Fans，中學時期有無去買文具或者而家有無去買衫都好，行街經過無印良品，總係會入去睇睇有咩零食可以放喺學校Locker或者辦公室個零食櫃。最近開飯仔都去行咗個圈，揀咗其中三款都幾飽肚嘅宇治抹茶零食一齊評價，就發現唔係樣樣都咁抵買啦......

抹茶切片蛋糕

蛋糕口感比較實，不過氣孔亦比較多，加上牛油香味唔重，唔會太Heavy。宇治抹茶味道非常濃郁，有甘甜嘅餘韻。北海道紅豆粒唔多，不過勝在味道自然香甜。最後補充一句，開飯仔覺得凍食更能夠突顯抹茶香味，建議可以放雪櫃一陣再食！

價錢：$32
茶味：*****
甜度：***
吸引度：****

抹茶朱古力曲奇

用宇治抹茶加朱古力粒同燕麥一齊焗，口感比英式曲奇煙韌但又比美式曲奇乾身，有少少兩頭唔到岸嘅感覺，如果可以再鬆化啲會更吸引。一打開就聞到少少茶香，食落亦有抹茶嘅清新味道，不過就無回甘嘅感覺。朱古力粒唔太甜，唔會搶走抹茶香味。

價錢：$22
茶味：***
甜度：**
吸引度：**

抹茶多士

多士得一面有抹茶醬，食落甜度就啱啱好嘅，不過就唔係好食得出抹茶味。彈完都要讃嘅，多士口感非常脆，而且Bite-size減低罪惡感，當普通零食解決平時口痕都係個唔錯嘅選擇，但抹茶控就唔好抱太大期望啦。

價錢：$20
茶味：*
甜度：***
吸引度：**

同場仲有唔少抹茶零食，同即沖抹茶Latte，抹茶控得閒可以多啲留意下啵。