夏天食雪糕雪條是常識吧。而今個夏天都未正式嚟到，就已經有好多種新款嘅雪糕雪條搶閘出爐。有牛奶味、有芝士味、有鮮果味……款款個樣睇落都好似好吸引咁，媽呀我有選擇困難症，點算好？

唔使煩，開飯仔冒住變肥仔嘅危險，幫你哋逐條逐條親身試味！邊條係咩味？邊條最抵食？睇我份報告啦。

香蕉冰雪條

全條雪條清一色淡黃色，睇落好似冇乜特別，之但係一啖咬落去之後，係有啲驚喜嘅。香蕉味都算幾突出，又唔會話甜椰椰咁。你都知香蕉味嘅製品要中伏其實好易，不過呢隻就唔會，食下食下都幾快食晒一條。

價錢：$15.9
抵食度：***
吸引度：****

Haagen Dazs S型雪條

Häagen-Dazs最近出咗足足6款新嘅脆皮雪條，有外脆內趣嘅特色！脆皮全部都係用比利時朱古力，三款仲加咗杏仁粒，咬落好脆口，係成條雪糕嘅亮點（之一）。六款口味當中岩鹽焦糖味甜甜地鹹鹹地，綠茶味道都OK濃，而士多啤梨就帶自然微酸，啱哂唔鐘意太甜嘅朋友仔～ 其他3款口味包括云呢嗱焦糖杏仁、夏威夷果仁脆糖同朱古力杏仁，都試得過呀。

價錢：$29.9
抵食度：***
吸引度：*****

樂天鮮果雪條

呢條鮮果雪條好似好受歡迎，開飯仔頭幾次去親便利店都話賣晒。就咁望落去個樣七彩繽紛咁的確幾靚幾吸引，食落去主要食到菠蘿味，啲菠蘿汁好甜，仲可以咬到菠蘿果肉，有少少菠蘿冰嘅感覺。另外有士多啤梨肉，都係甜嘅，但包裝上嘅奇異果同芒果，我食嗰條就真係唔多發覺嘞。Any肥，果味算係幾出，受歡迎都真係有原因der。

長：約9cm
價錢：$17.9
抵食度：****
吸引度：*****

樂天蕃薯雪糕

冬天就話成日喺街見到有檔仔賣煨蕃薯，夏天就應該冇得食啦。吖，又估佢唔到，有冰凍版！呢款蕃薯雪糕係嚟自韓國嘅，個樣都成條蕃薯咁，面頭有曾餅皮包住，但可惜係腍嘅，但係中間黃心雪糕呢，好有驚喜喎，好重蕃薯味，好似真係食緊條凍蕃薯咁。

長：約17.5cm
價錢：$17.9
抵食度：*****
吸引度：*****

樂天藍莓芝士雪糕批

雪糕嘅牛奶味同芝士味道平衡，芝士控應該都會收貨。不過藍莓糖漿偏甜，食唔到藍莓嘅酸味，加上白朱古力皮亦都係得個甜字，整體嚟講有少少過甜，啱曬啲甜魔。

長：約10.5cm
價錢：$17.9
抵食度：***
吸引度：***

樂天芒果芝士布甸雪條

雖然個名係芒果芝士布甸，但唔多食到啲芝士味，反而芒果味就幾香甜，口感介乎於雪糕同雪葩中間，要注意嘅係比較容易溶，相機就唔好食咁耐啦~

長：約10.5cm
價錢：$13.9
抵食度：****
吸引度：***

Lavelee 藍莓乳酪

又係韓國雪條，乳酪味都幾出，不過係偏甜少少嘅乳酪，而每食一啖都會食到一粒粒嘅野生藍莓，係鮮甜嘅。你咪睇佢細細條，都有幾多粒呢啲野生藍莓㗎，由頭到尾都食得到，幾開心。如果條雪條可以再大條啲就好喇，唔係好夠喉呀！

長：約9.5cm
價錢：$12.9
抵食度：***
吸引度：****

Lavelee 三文治 – 朱古力

雪糕三文治淨係個名都已經有一定嘅吸引力，佢用朱古力蛋糕包住一底一面，鬆鬆軟軟咁，夾住嘅唔止係朱古力雪糕咁簡單，食多兩啖仲會見到係有成塊Oreo夾心㗎！成嚿三文治就有兩塊Oreo，軟雪糕加脆餅，出色呀。（利申：朱古力控，所以呢嚿食落係幾種唔同朱古力layer嘅雪糕好得我歡心）

長：約11.7cm
價錢：$16.9
抵食度：****
吸引度：*****

Lavelee三文治 – 芒果

同牌子嘅雪糕三文治，唔係淨係朱古力味變芒果味咁簡單，連三文治嘅皮都徹底唔同咗。今次係實啲嘅蛋糕皮嚟，清一色芒果雪糕就微甜啦，花臣唔多，但勝在夠晒大條，食完會有飽嘅感覺。

長：約20cm
價錢：$16.9
抵食度：*****
吸引度：***

Futaba 香濃牛奶雪條

嚟自日本嘅牛奶雪條，成條都白雪雪，食落都係堅重牛奶味，所以，佢叫得香濃牛奶雪條係冇呃你嘅。雪條本身質地偏軟腍，係滑嘅，不過算係溶得好快，咬下食下啜下咁，細細條三兩啖就食完嚕。

長：約9cm
價錢：$12
抵食度：**
吸引度：***

草莓 / 芝士藍莓醬大福雪餅

兩隻大福嘅糯米皮都略嫌太厚，而且有啲黏手，入面係正常嘅雲呢嗱雪糕，中間粒士多啤梨乾雪凍咗比較硬，整體口感唔算話好夾，但味道都不過不失嘅。另外隻芝士藍莓味呢，芝士味係好重嘅，不過唔知係芝士味太重定藍莓味太輕，唔係好食到藍莓味囉，嗯，CP值比較低。

直徑：約5.5cm
價錢：$13.9
抵食度：**
吸引度：**

最中雪糕 – 芝士朱古力

最中係日本嘅點心嚟嘅，大概就係脆薄餅咁啦。呢款最中雪糕，就係有層薄薄嘅威化脆餅，夾住嚿雪糕。芝士朱古力味嚟講，芝士味係濃郁嘅，仲幾香添，不過朱古力味就唔多爭氣，得輕輕幾條痕咁嘅理石紋朱古力，唔夠味呀。

直徑：約9cm
價錢：$14.9
抵食度：***
吸引度：***

最中雪糕 – 抹茶

至於抹茶味，係香濃得嚟仲有啲甘甘地嘅味，抹茶控朋友表示喜歡。唔係純綠茶嚟㗎，中間仲夾雜住咗啲微甜嘅紅豆㗎。幾時都話，綠茶同紅豆絕對係perfect match，今次都唔例外呀。

價錢：$14.9
抵食度：***
吸引度：****

（此文會不定期更新）