雪糕是王道！無論咩季節咩天氣咩地方咩心情都要食雪糕（好似係）。銅鑼灣呢間曲奇店，都賣埋雪糕呀！仲要係幾特別嘅口味——燒棉花糖！係創新嘅。
燒棉花糖味嘅雪糕望落去，真係棉花糖咁嘅色，灰灰白白，店員話係佢哋自己創作嘅配方調製。食落嘅質感，軟滑得嚟又有少少棉花糖嘅黏口感，幾得意。唔好以為棉花糖就一定好甜，啱啱相反，輕輕咁食到棉花糖味，唔太甜，原來係因為喺製作過程入面，只係單純用棉花糖去整，而冇再額外加糖。
伴喺雪糕側邊嘅一串魚蛋，真身係炸曲奇嚟。曲奇可以揀棉花糖曲奇或者朱古力曲奇，揀完之後就會即叫即炸，棉花糖曲奇咬開，係朱古力漿加成粒棉花糖呀，甜度相對較高。
更多【飲食潮流】： |
而話明曲奇店，舖頭當然會有現烤曲奇賣啦。每日有4款，例如海鹽焦糖黑朱古力咁，舖門門面好窄，一唔小心就行過咗㗎喇留意返。
Homie Cookies
地址：銅鑼灣耀華街3號百樂中心1號地舖
文、相：Kar