情人節要食甜品是常識吧，一年一度2月14當然要揀特別啲嘅甜品先得啦。未做功課唔緊要，開飯仔幫大家揀咗以下情人節期間限定，或者特色Pop-up店嘅出品，睇下有無你位Sweet Heart嘅心水？
 

自己砌字母朱古力盒　　Sayvour

如果你有「情深說話未曾講」，不如搵佢地幫手？呢個香港特色朱古力品牌喺尖沙咀海港城開咗Pop-up店，佢地選用世界各地高級食材研製出唔同口味嘅朱古力。最特別嘅就要數到手工製作字母朱古力，可以自己組合唔同字句，啱哂示愛。
 

北海道人氣朱古力　　Le Chocolat LeTAO

呢個北海道小樽同樣喺海港城開咗期間限定店，帶嚟朱古力系列五款特別甜品：精選法國頂級香檳搭配牛奶朱古力嘅香檳酒心朱古力，用西班牙香橙橙皮加兩種香甜朱古力同酒香朱古力漿嘅香橙朱古力條，口感鬆軟甜而不膩嘅幸運草蜂蜜蛋糕，各有特色嘅海鹽夏威夷果仁朱古力同甘脆牛奶朱古力。
 

粉紅色心形馬卡龍　　DALLOYAU

根據非正式統計，最能夠令少女心心眼嘅Keyword當中就有粉紅色同馬卡龍，如果係粉紅色愛心形馬卡龍更加無得輸啦。呢間法國甜品餐廳就推出情人節限定特別版Macaron Rosé，粉嫩愛心造型精緻得嚟，淡淡玫瑰花香加上店方獨創嘅少糖配方，由內到外成個Package就係太完美。
 

日本直送白草莓蛋糕　　東海堂

如果你另一半鐘情清甜口味，咁呢間烘焙店嘅情人節蛋糕系列就啱哂喇。最吸睛嘅「純白‧心語」用咗日本靜岡直送嘅白士多啤梨，白裡透紅清甜多汁。而「赤莓‧心動」亦係用咗日本士多啤梨，鮮紅飽滿果香濃郁。最緊要係兩款蛋糕都係心形，上面再加牛乳忌廉同食用銀珠裝飾，自拍睇落都特別Sweet。
 

百變朱古力曲奇　　Blesscuit Bakery

放心，呢間曲奇店嘅曲奇絕對同新年收到怕嘅顏色罐曲奇唔同。佢地最近喺尖沙咀海港城開咗Pop-up店，而且仲有限定版朱古力系列曲奇禮盒「祝·喜悅」，入面有四款特別口味：薄荷朱古力、西柚朱古力曲奇、咖啡牛奶朱古力曲奇同黑朱古力曲奇，最啱朱古力Fans慢慢細味。

文：Cathy

開飯編輯推介：

1. 【專訪】音樂人開餐廳 由做音樂到做食物

2. 12月份好評餐廳十強

3. 2017年港澳版米芝蓮指南

熱門文章推介：

1. 【一個人開飯】一個人喺旺角食乜好？

2. 【熟食中心尋寶】鵝頸熟食中心

3. 【生日飯局】同好朋友慶生食咩好？ 窩心西餐篇

隨時接收最新資訊
讚好OpenRice專頁！