明白嘅，情侶行行下街，想搵間Cafe休息下食啲嘢好正常。問題係香港好似有好多Cafe，但真正要搵間Hea下嘅時候發現唔係太嘈傾唔到計就係唔抵食，唔想次次都去連鎖咖啡店，開飯仔就幫大家揀咗呢7間分佈喺唔同地區嘅Cafe，有特色得嚟嘢食都唔錯㗎。
灣仔Cafe幫你寄情信 香港郵意明信片航海主題咖啡廳
圖：cindyk88
你有幾耐無拎起支筆寫信呢？呢間Cafe係明信片x航海主題，嚟到可以買張Postcard或者心意卡，仲有埋郵筒幫你寄出去。嘢食方面選擇眾多，最多人推介重量級嘅全日早餐，男士都唔洗怕唔夠飽，再嗌多份焦糖雪糕香蕉窩夫或者特濃抺茶鐵板Affgato，滿足埋女士嘅甜品胃就Fit哂喇。注意小店有貓星人出沒喔。
銅鑼灣與貓咪約會 Mr. & Mrs. Cat Cafe
圖：糖小妹
香港有好幾間樓上貓咪Cafe，呢間勝在近地鐵站之餘，嘢食水準亦高，喺你另一半忙住同貓玩（或者被貓玩）嘅時候，自己又可以食「好西」。懶得諗嘅話可以試二人份嘅招牌二人全日咸甜點貓捕雀鳥籠Tea Set，又或者嗌飲品再加佢地最出名小食玫瑰花雕醉貓雞翼，帶花雕酒香又夠入味。Cafe有八隻貓咪，注意要先換拖鞋，摸貓咪之前亦要消毒雙手。
上水少見浪漫Cafe Cafe Je T'aime
講起上水剩係諗起藥房同水貨客？其實行過嚟舊墟你會搵到一間浪漫Cafe，由兩夫婦開設，牆上畫滿手繪同唔同國家語言嘅「我愛你」，茶具同餐具都相當精緻。Menu以沙律、意粉同蛋糕等輕食為主，分量較細不過味道唔錯。另外必試佢地嘅飲品，無論係花茶定特飲都有特色。老闆最近表示因為租金壓力，可能會喺年底結業，想試嘅朋友仔動作要快喇。
尖沙咀Hea住嘆抹茶蛋糕 只
圖：良善熊熊
喺尖沙咀想搵間環境舒服可以Hea耐少少嘅餐廳，就要行遠少少嚟呢間樓上Cafe喇，想坐近大玻璃窗嘅梳化位建議早啲打電話訂枱。必試週末限定嘅抹茶磅蛋糕，賣相簡單食落鬆軟綿密，抹茶味香得嚟啱啱好。平日亦可以食烤芝士年糕配泡菜，上面有塊車打芝士，切開年糕裡面都仲有半融芝士，夾埋泡菜一齊食，一軟一爽一鹹一辣咁超得意。
鴨脷洲傢私店溫馨Cafe Tree Cafe
根據非正式統計，有唔少情侶都會行傢私舖，一邊幻想將來間Dream House一邊去食平靚正小食。其實除咗IKEA Bistro，鴨脷洲呢間傢私店同樣都有間Cafe，木製枱櫈加上有大玻璃窗望住海景，感覺特別溫馨悠閒。食物以沙律、包、三文治同蛋糕為主，Panini即叫即製，夠熱夠脆；Cottage Pie香味十足，青豆肉醬加薯蓉亦夠飽肚。
大埔郊外小白屋 森林咖啡
圖：為食MoJil
又如果你地鐘意週末去郊外行下呼吸下新鮮空氣，大埔林村呢間喺樹林入面嘅英式白色小屋就係其中一個休閒加油站。Menu嘢食選擇唔算多，只有漢堡、沙律、小食同蛋糕。大食漢堡嘅漢堡扒足8oz，森林安格斯漢堡更加係用咗原塊美國牛扒。飲品選擇較多，特別係咖啡仲有唔同特別沖法。溫馨提示嚟之前記得做足防蚊措施。
旺角抵食樓上Cafe Infinity Workshop Cafe
圖：joggling
如果你另一半係大胃王，旺角呢間Cafe就啱哂喇。佢地嘅出品分量適中之餘亦食得出誠意，黑松露油炒鮮帶子虎蝦意粉有香濃黑松露香味，虎蝦爽口彈牙。特式漢堡三重奏嘅包烘過特別脆配和牛或者魚柳，再加外脆內糯嘅炸薯條無得輸。心太軟等甜品同童話世界特飲同樣出色。全層都係Cafe，枱同枱中間空位亦充足坐得夠舒服。
文：Cathy
更多【二人前指南】：
熱門文章推介：
隨時接收最新資訊
讚好OpenRice專頁！