唔好話開飯仔偏心喇，【二人前指南】今次唔幫情侶，幫姐妹閨蜜聚會搵餐廳！兩三個女仔想搵間有主題裝修可以自拍打卡，嘢食有特色，仲要無限時得嚟又好坐嘅餐廳或者Cafe？以下推介或者就可以一次過滿足哂三個願望！
屯門後花園Fusion菜 聚福樓
圖：fion722
聽呢個名以為係咩中式酒樓？其實佢係一間裝修幾別緻嘅Fusion餐廳！門口同室外座位有唔少植物裝飾，行入去室內樓底又夠高，話係呢區嘅後花園絕對無誇張。Brunch有All Day Breakfast、漢堡包、窩夫、意粉等選擇。而且Menu相當搞笑，Eggs Benedicts叫班尼迪克先生嘅蛋，烤雞意大利飯竟然叫米收埋隻雞，打卡都唔洗驚諗唔到Caption啦。
西環空間感Cafe Artisan Room
想再坐嘅舒服啲？咁香港大學站附近呢間Cafe就啱你地喇。裝修簡潔明淨，室外露天茶座有梳化位，室內樓底高唔會有侷促感。而且佢係全港唯一一間咖啡店有一部3.5呎高仿歌德式建築嘅冰滴咖啡機Gothicism，鐘意飲咖啡嘅朋友仔唔好錯過！飲咖啡之餘仲可以一試佢地嘅閃電泡芙或者水果撻，同樣有外表又有內涵。
尖沙咀花店x鮮花料理 朝花夕拾
如果你鐘情花藝Cafe嘅話，相信你應該已經去過旺角嘅小房子，佢地嘅花藝師今次搵埋日式料理廚師同茶藝師合作，喺尖沙咀開咗呢間花店x鮮花料理餐廳。落完Order等嘢食嘅時候不妨先自拍一番，但記得留返啲位喺記憶卡影嘢食！唔單止保留返招牌櫻花水信玄餅，用食用花整嘅天婦羅百花滿園，賣相超精緻嘅蟹肉梅素麵花湯凍三堇玉立都超值得相機食先。
更多【二人前指南】： |
荃灣相機食先Cafe 白宮
而家揀餐廳除咗要好食之外，仲要睇可唔可以「呃Like」，而呢間Cafe就寫到明以「相機食先」做主題，裝修簡單不過就有唔少特色擺設可以借嚟影相，最啱同姐妹搵個晏晝去大影特影。而且食物亦有用心，All Day Breakfast大堆頭夠豐富，小食例如薯條或者雞翼又會用得意籃仔裝。而熱飲仲可以揀唔同公仔或者字句圖案裝飾，心思加分。
尖沙咀粉系英式下午茶 L' Tea Room
跟進非正式統計，唔少女孩子都鐘意英式三層架Afternoon Tea，如果加埋水晶吊燈、花藝裝飾同印花茶具，成個Package係咪更加吸引先？尖沙咀呢間樓上茶室就搵到喇，佢地會不定期推出唔同主題嘅三層架下午茶，例如最近有「鐵塔下的粉紅下午茶」，顧名思義用巴黎鐵塔同粉紅色做主題，最抵讃嘅係花茶仲可以添飲又唔限時，影完相仲可以吹多陣水。
灣仔懷舊台灣菜 1963 木十豆寸
睇唔明個餐廳名？其實1963係代表餐廳位於1963年建成嘅唐樓，而木十豆寸係將個樹字拆開。餐廳店主特別鐘情懷舊事物，唔少擺設甚至係窗花都係古物。而餐廳主要供應台灣菜，，餐具上面都會有唔同花紋，最盞鬼嘅係筷子上面會有唔同字句，打卡位真係數唔到咁多。紅燒牛肉麵同滷肉飯味道亦有板有眼，唯獨要注意食物分量偏細。
馬鞍山坐榻榻米曬太陽 屋子生活
雖然人唔洗吸收陽光做光合作用，但偶然曬下太陽，個人心情都會好啲。呢間Cafe就有個超大嘅落地玻璃窗，坐埋喺窗邊嘅榻榻米，簡直就係舒服到唔想郁。兩個人去嘅話可以嗌一份關西牛肉定食或者七味雞唐揚定食，然後再加兩個甜品Share嚟食，因為佢地嘅甜品唔單止有窩夫、梳乎厘同手工蛋糕等選擇，而且賣相同味道都唔錯㗎。
文：Cathy