Odelice! (蘭杜街)

法國餐出名又貴又細碟，最近發現呢間小菜館，用相對平價嘅價錢就可以品嚐高質法國料理，裝潢簡約，相比之下Casual少少，適合約另一半嚟小聚一吓。另外店內環境唔大，建議提早留位。前菜送上餐湯同麵包，濃稠度適中，麵包鬆軟。火腿芝士拼盤包含法式火腿、西班牙火腿、康堤芝士同Reblochon 芝士，火腿當日缺貨改為煙三文魚，鹹香味突出，配上脆脆麵包十分開胃。私心推介法式點心拼盤，有齊六款小食，一人一粒啱啱好，黑松露波波最有驚喜，外層炸至酥脆可口，炸皮夠薄身，咬落爆漿，令人一試難忘。蟹肉塔塔同塔皮都唔錯，出面比較少見。主食有原隻烤龍蝦，以芝士同忌廉煮大蔥烤焗，再配龍蝦番茄醬汁，少量薯粒同酸種麵包。龍蝦大大條，新鮮，彈牙，打卡able又好味。阿根廷安格斯牛脊肉，啖啖肉、薯粒外層微脆，內餡軟熟、點埋鴨肝白蘭地醬汁更特別。