樂意點心

营业中

休息中

星期六日經過漢口道都例必見到樂意大排長龍，我今日平日去，終於可以有位啊！《白桃烏龍茶》一般茶樓都係傳統茶葉，但呢度有白桃烏龍，我一定揀啦！好香嘅白桃味，茶身好滑，完全冇鞋口感覺，出奇地有份開胃感覺添。另外我好鍾意個茶壺，又靚又可以斟多幾杯。《蘋果雪耳沙參玉竹燉排骨湯》同朋友一齊Share，好秋冬進補感覺，清甜潤！《紅菜頭蘿蔔絲酥餅》我平時都好鍾意呢款點心，但紅菜頭做就第一次食，口感好好呀，又健康！《鮑汁花膠鵝掌》見到隔離枱食賣相好得，我哋都想食！花膠同鵝掌都炆到好淋身又入味，好重骨膠原，好養生美顏，而且好抵食。《籠仔蒜蓉龍蝦飯》蒜蓉粉絲必食，籠仔蒸飯本身都超香，加埋蒜蓉豉油撈飯一流！仲可以淋埋鵝掌嘅鮑汁，當堂好似去咗食高級晚餐咁！《杏汁燉蛋白》Keep住滋潤，杏汁比想像中偏甜，不過蛋白好香好滑，好好味😋食完餐飯完全明白排長龍嘅原因，呢間唔係打卡呃Like店，真係用心機去做嘅點心店呢！餐牌仲有好多野我想食，下次再食過。