The Pearl

成日都經過呢度，但係都一直唔知道呢度有間餐廳，咁啱有日上網見到有人介紹，咁就緊係要來試吓啦。估唔到呢度嘅入口咁細，但係入面嘅裝飾好靚，好適合打卡。一上到餐廳佢嘅室內已經好多客人，我哋選擇咗坐室外，因為比較適合影相同埋大聲傾偈。一嚟到我就叫咗個吞拿魚他他，因為一入嚟就已經見到隔籬枱食緊，佢嘅賣相好靚好適合影相。食落比外表更加出色，佢嘅吞拿魚感覺好新鮮，而且好開胃。令我仲叫咗呢個Parma Ham加蜜瓜，估唔到佢啲蜜瓜咁大舊，襯埋Parma Ham好夾，而且食落好甜好新鮮。呢個大蝦扁意粉又係好出色，佢有好多隻蝦，而且蝦肉食落好彈牙，醬汁唔係好濃，食落清清地好適合女仔。香煎牛封門柳又係好出色，佢嘅牛肉好有牛味，而且切得厚薄適中，煮嘅時間都啱啱好，食落完全唔會有筋，非常推薦大家嚟試吓。呢度嘅Cocktail賣相好靚，我就最鍾意呢杯peardise ，佢飲落酒味唔算好濃，有少少梨汁嘅味道，好適合女仔飲，而且杯上面仲放咗一支髮簪，打卡一流。呢間酒店酒吧又平又靚，好推薦大家嚟試吓。