影片
更多
2023-08-13
366 浏览
大家都知我徹頭徹尾係一個牛魔王，雖然老婆大人食唔到牛但係佢好錫我成日都會帶我去食靚牛肉，今次又請我去一間好正嘅鐵板燒，仲同埋兩個朋友一齊去食真係好鬼Happy。沙田帝都酒店入面呢間櫻田日本餐廳原來我第一次嚟食咋！入面嘅裝修好有現代感但又不失傳統味道，嚟呢度可以食到日式火鍋、壽司刺身、定食，同埋我哋今晚要食嘅鐵板燒好多樣化。食鐵板燒當然坐喺鐵板吧枱前面！睇住師傅逐樣逐樣整出嚟熱辣辣咁食落肚先至最高享受㗎嘛。我哋食鐵板燒套餐可以用九折叫樽裝清酒，鍾意㗳返兩杯嘅我梗係死唔蝕底啦。有清酒飲叫番兩個小食送下酒先！叫咗枝豆同埋燒雞泡魚乾兩樣用嚟送酒都好啱Chanel。我哋今次嚟食8月先推出嘅大分縣A5豐後和牛套餐，主菜食嘅全部都係大分縣A5豐後和牛，有厚燒有薄燒仲有我同老婆大人食嘅二人套餐好豐富㗎！第一樣要食嘅係野菜沙律，啲菜好新鮮加埋啲藜麥呢個沙律真係好鬼健康。跟住我哋每人都有兩片吞拿魚腩刺身，魚味夠濃食落去又冇筋口感好香軟。我哋揀嘅三個套餐都做緊激安價，由900蚊起至2100蚊全部都有九道菜，多嘢食到不得了保可以飽到上心口走人。呢晚招呼我哋嘅係Joe師傅夠晒高大威猛好有台型。我同老婆大人叫咗大
沙田帝都酒店入面呢間櫻田日本餐廳原來我第一次嚟食咋！
入面嘅裝修好有現代感但又不失傳統味道，嚟呢度可以食到日式火鍋、壽司刺身、定食，同埋我哋今晚要食嘅鐵板燒好多樣化。
食鐵板燒當然坐喺鐵板吧枱前面！睇住師傅逐樣逐樣整出嚟熱辣辣咁食落肚先至最高享受㗎嘛。我哋食鐵板燒套餐可以用九折叫樽裝清酒，鍾意㗳返兩杯嘅我梗係死唔蝕底啦。
有清酒飲叫番兩個小食送下酒先！叫咗枝豆同埋燒雞泡魚乾兩樣用嚟送酒都好啱Chanel。
我哋今次嚟食8月先推出嘅大分縣A5豐後和牛套餐，主菜食嘅全部都係大分縣A5豐後和牛，有厚燒有薄燒仲有我同老婆大人食嘅二人套餐好豐富㗎！第一樣要食嘅係野菜沙律，啲菜好新鮮加埋啲藜麥呢個沙律真係好鬼健康。
跟住我哋每人都有兩片吞拿魚腩刺身，魚味夠濃食落去又冇筋口感好香軟。
我哋揀嘅三個套餐都做緊激安價，由900蚊起至2100蚊全部都有九道菜，多嘢食到不得了保可以飽到上心口走人。
呢晚招呼我哋嘅係Joe師傅夠晒高大威猛好有台型。
我同老婆大人叫咗大分縣A5豐後和牛、活澳洲鮑魚御膳二人前，第一樣就係激生猛嘅鐵板燒活澳洲鮑魚。
Joe師傅三扒兩撥就將一隻超大的澳洲鮑魚解體！切成薄片之後擺返去鮑魚殼入面仲好鬼浪漫咁送我哋兩朵玫瑰花，然後着晒火咁上枱真係好鬼打卡。鮑魚片煙韌蛋牙味道鮮美，同埋鮑魚真係大隻得太過分我哋過足鮑魚癮。
然後我哋仲有鐵板燒比目魚食，師傅將魚皮起咗出嚟跟住燒到脆卜卜食落去好似薯片咁香噴噴，加埋好有質感嘅比目魚肉好味喎。
朋友就叫咗呢一個大分縣A5豐後和牛厚燒御膳一人前，基本上菜式有部份係一樣嘅唔同嘅就係兩個海鮮，佢就有呢個鐵板燒車海老同埋鐵板燒活扇貝。
另外一位朋友就食呢個薄燒A5豐後和牛御膳一人前套餐，佢嘅海鮮就係活乳龍蝦同埋蟶子，不過今晚冇蟶師傅改派咗鵝肝上場。
終於等到我最期待嘅鐵板燒大分縣A5豐後和牛，我哋嘅二人套餐可以揀薄燒或者厚燒，我就揀咗有咬口嘅厚燒A5豐後和牛。
未燒牛肉之前師傅整咗南瓜、翠玉瓜同埋粟米芯，鍾意食蔬菜嘅老婆大人睇到眼都唔眨。
師傅呢一嘢超級勁火焰燒牛肉真係好好睇！其實除咗好睇加咗酒落去牛肉都會零舍香口好味。
呢件厚切嘅大分縣A五豐後和牛真係燒得好香嫩，牛肉味超級濃郁食落去好香但係又唔會覺得肥膩！係我近來食過嘅和牛之中頭一兩位。
薄切另外有佢嘅魅力你知啦有好多人怕啖啖肉㗎嘛！呢個就喺牛肉中間包咗啲香蔥同埋蒜片，食落去唔會好似厚切牛肉咁勁油份。
唔食牛嘅老婆大人就可以轉呢個日本豚肉薄燒，佢話呢個豚肉味都好唔錯喎。
食到呢度老婆大人都已經投降咁滯！師傅繼續幫我哋煮呢個鐵板燒煙肉櫻花海老炒飯。
炒飯香噴噴咁送嚟整到一粒粒咁好爽身，入面加咗鹹香嘅櫻花蝦食落去好惹味。
味噌湯入面仲有好多海鮮，比我平時飲嘅麵豉湯多咗好多鮮味出嚟！仲有鐵板燒炒野菜煮得好香口又冇豆腥味好食呀。
呢個餐嘅甜品係日本雪糕，食完熱辣辣嘅鐵板燒之後食個凍冰冰嘅雪糕真係好爽呀。
櫻田日本餐廳 電話：26943810
地點：沙田白鶴汀街8號帝都酒店3樓
张贴
