OX Steak Lounge

营业中

休息中

裝修雅緻、成個vibe有種時光倒流感覺、不失浪漫，適合老派約會。而且店員親切、食物美味，性價比甚高。叫咗兩個set dinner, 埋單唔使一千。 ✦ 自家製生牛肉他他 牛肉他他肉質鮮嫩，加上鹌鹑蛋更為滑溜。撈埋蕃茄、洋葱粒等帶點酸辣，食落更開胃。 ✦ 牛肝菌野菌忌廉湯 配牛骨髓牛油包湯睇得出多菌粒，成個湯非常香濃。質地相對稀身，唔會太飽肚。牛骨髓牛油帶少許蒜香，用牛骨髓上，幾有特色。 ✦ 香煎紐西蘭羊架 好值得讚賞，份量多、擺盤靚，煎得啱啱好、肉質鮮嫩、啖啖充滿羊肉汁，連汁都唔需要淋。齒頰留香。 ✦自家製A5和牛手工千層麵以和牛代替普通牛肉，肉味相對香，脂肪亦更豐富。和牛油脂滲喺麵當中，更為有油香、滑溜。麵質亦相當有口感、有彈性。 ✦ 特濃開心果麻糬杯 做得非常好，為成餐飯畫龍點睛。開心果好香濃、順滑、厚重，間唔中食到一兩粒麻糬又多份煙韌口感。值得讚。 惟一缺點係餐廳位置唔算就腳，門口亦唔起眼，好容易走寶。