樓上大排檔

個人幾鍾意大排檔，但因環境因素，例如潔淨度等，又唔鍾意去傳統嘅大排檔。灣仔呢間新開嘅「樓上大排檔」位於一棟商業大廈，地方寬闊，潔淨度較高，裝潢彷照傅統大排檔設計，亦有唔同牌匾舖頭名，感覺相當玩味，非常新潮岩後生仔去。

1

豉椒炒蜆 ($128): 豉汁濃郁稠密，微甜，蜆肉幾入味。

樓上小炒皇 ($148): 小炒皇非常足料，除左主軸韮菜外，用料包括鮮蝦、魷魚、帶子、魚乾、腰果等等，可謂肉多過菜，實屬少見，都幾誇張，味道鮮香，幾有鑊氣。

豉油皇炒鵝腸 ($158): 鵝腸十分爽滑，部份仲連住少許脂肪，非常香口，豉油鹹甜適中，食落唔會太膩。

招牌脆皮炸子雞 ($158): 雞皮脆卜卜，雞肉亦非常嫩滑，肉汁豐富，雞件本身夠味，唔太需要蘸醬食。

蟹油炒麵 ($108): 豉油皇炒麵用蟹油炒聽落有啲邪惡，表層仲放了大量炸蒜，係幾香口惹味，唔會太鹹，食落亦唔覺特別膩，幾好食。

每位均奉送糖水一碗，今晚提供嘅係蕃薯糖水，甜度適中，薑味突出，幾驅寒，仲有幾件大大舊嘅蕃薯。