大圍小館

营业中

休息中

見啲評語都係好壞參半，本身都無咩期望，只係一心想試吓個叉燒，點知….嘩真心好味，可以再番去食。首先講個叉燒，原本見到得5件，心諗有冇咁巴閉俾得5件，點知原來係好大件架，5件等於一個例牌。上枱後服務員會係你面前掃啲鳳梨汁再用火槍燒，燒到少少脆咁，食嗰時其實係甜甜哋但又食唔到鳳梨味，但味道係ok，最緊要係啲肉好淋，咁厚都咁淋真係好勁，真心欣賞。個黑胡椒蟹炒蘿蔔糕好新穎，隻蟹算大隻，啲肉好鮮嫩，完全唔乾，400幾蚊抵食。金沙鮮魷魚好熱好新鮮，絕對唔係番炸。今次因為得兩個人去食，唔試得多餸，下次要大斑人去先可以試啲特色菜。另外要提下啲服務，見好多人批評佢服務差，但我哋今次去又唔覺，反而覺得佢哋服務員人數好夠，成餐飯都有人幫手加水換碟好主動，禮貌都好好。唯一可以改進少少就係，7:15（我哋食6:00，應該8:00要還枱）就問你有冇野要加，感覺有啲啲催你落單，但都明白嘅如果有野加，上得菜嚟食得嚟就會夠鐘。最後仲有糖水送，真係十分十分滿足。