麵家

营业中

休息中

銅鑼灣登龍街真係好多好野食，當中有唔少食麵嘅餐廳，呢一晚試咗一間主打港式粉麵嘅小店。餐廳佈置簡約，地方唔太大，但環境舒適好坐。秘製慢煮牛腩麵（$58）- 據聞餐廳特別呢個慢煮方法，令牛腩入口特別嫩滑。湯底特別點咗餐廳嘅招牌雞白湯，呢個雞白湯熬湯8小時以上，唔怪之得味道咁濃郁啦。最重要係冇落味精，感覺健康好多。咩都有撈麵（$86）- 加咗$12要咗蝦子麵，味道非常之惹味，配上多款唔同嘅材料，包括牛腩、牛丸、雲吞、魚蛋、墨丸、貢丸等，好有驚喜。除咗牛腩之外，特別要推介吓佢嘅牛丸，入口彈牙juicy。另外佢嘅雲吞大大粒，係自家製，非常之足料。另外要讚一讚佢嘅麵非常高質，原來用上老字號永樂粉麵廠，唔怪之入口咁彈牙好味啦。香脆魚皮（$22）- 份量好多，魚皮大大塊，入口非常之香脆好味，絕對係必食推介。