阿木台灣麵 (豉油街) (已搬遷) 新店位置

最近天氣好熱，唔係好想食好多嘢，食台灣嘢就啱啱好，可以食多啲小食，相對上就有胃口啲。最近冇假冇得返台灣，嚟阿木思下鄉都幾唔錯。‣ 黑糖珍珠鮮奶 $34珍珠煮得好軟糯，配埋黑糖嘅甜，濃郁嘅奶香，真係夏天嘅恩物。‣ 金桔檸檬話梅汁 ＋$17冇乜胃口嘅時候，飲啲酸酸甜甜嘅嘢就夠晒開胃。話梅有微微嘅鹹甜，食啲炸物都可以平衡到油膩感，最後都忍唔住食埋粒話梅。‣ 芝士肉鬆蛋餅 $55蛋餅剪得金黃香脆，我自己幾鍾意嗰種濃郁嘅蛋味，而我覺得餅皮本身整得幾好，唔會太厚身覺得好滯。入面真係塞滿晒肉鬆，芝士唔會好多，但係都啱啱好唔會令到成個蛋餅太膩。‣ 炸雞排 $42雖然個雞扒要等多一陣，但係上枱嘅時候見到炸得熱辣辣，啲肉都好嫩滑，望到個橫切面都覺得不得了，其實食住等都唔算得係啲咩。份量嚟講兩個人分享，我覺得差唔多，都值得嗌。‣ 紅燒牛肉牛筋麵 $79下午茶時間就唔係太想食飯，所以就嗌咗碗麵。牛肉同牛筋燉得軟腍入味，湯底濃郁得嚟帶點微辣，啖啖都係牛嘅香氣，麵條彈牙爽口，連埋蔥香，好快就食晒成碗麵。