豐鮪

营业中

休息中

喺社交平台group見到有人po呢個餐廳，聽聞佢原本係做批發嘅，最近先開呢間餐廳試下做零售，於是就同朋友過嚟試下。可能因為試業既關係，暫時個menu淨係得一種飯，所以我叫咗個 夢之丼（豐漬飯）$158，唔洗加一。個飯入面有切碎咗嘅黃蘿蔔、壽司薑同埋芝麻，食落幾有口感，同壽司醋飯一樣都係酸酸地，幾好味，成個飯唔使加豉油都好好食。係飯上面鋪上一塊大拖羅、三塊中拖羅、三塊赤身、一個吞拿魚蓉嘅燒賣，無可否認佢啲吞拿魚係幾新鮮，即使係赤身都幾肥美，中拖羅同大拖羅更加係有入口即溶嘅感覺，但比較可惜嘅係佢切得比較薄，食落去唔係好滿足，雖然好符合個價錢，但我寧願畀貴少少佢厚切一啲，咁就會更好。成個set仲有一個沙律菜、一個蟹麵豉茶碗蒸同埋一個飲品（可以選擇汽水或者麵豉湯），沙律菜都幾好味，酸酸地幾開胃，茶碗蒸上面嘅麵豉都算有蟹味，食落都可以。餐廳服務唔錯，問店員問題，佢都好有耐性解答。環境一般，感覺上始終都係一間專注食物品質嘅餐廳。