鷹巢

营业中

休息中

在旺角上班早就留意有新酒店即將開幕，搵食觸角已不停留意有無好野食，終於發現開了一間中菜叫鷹巢，個名就有d氣勢，馬上去試下得唔得。酒店好靚，中餐係落地玻璃窗，環境好舒服，未食先開心。午市點心種類不算太多，不過侍應推介叉燒皇，話係慢煮厚切，果然是極品，成寸厚叉燒咬入口竟然非常軟滑，肥瘦比例恰到好處，肉香油香加上燒烤過的蜜香，全檯8個同事都即刻俾like, 仲話一定要帶屋企人來試。8個人試左唔少點心，水準非常好，其中最推介的是炒蘿蔔糕，小方型上，所以煎香的面積均勻，又剛夠一口，特別好味，叉燒包都推介，因為普通的一個叉燒包，包皮做得鬆軟，配上多汁叉燒餡，拎上手都軟綿綿，包有香味，都唔係好多地方做到。必試一定是紅豆千層椰汁糕，賣相已經好靚一層紅一層白，未食已飄來椰香，紅豆更是滑滑起沙，椰香豆滑，又不會太甜，想不來一個簡單甜品也如此精彩。同事都吃得非常滿意，價錢算合理，畢竟是4星酒店的中餐，午飯差不多$120/人，但餐廳環境好，又唔多檯，唔會逼，食物質素仲非常好，旺角區都應該得這家，作為一個旺角人，又多一個搵食地方。