泰斗 (中達大廈)

营业中

休息中

今日放工同屋企人出咗尖沙嘴食泰菜，好彩有 book 枱，七點幾已經好 full... 😱餐廳有露天座位，環境啱得嚟好有情調，而且四周環境好熱鬧有氣氛～👍🏻今日我地先叫咗兩串鹽燒牛舌串，佢地係用牛舌芯，所以燒完都唔韌，仲好香口！加上點啲泰式醬汁甜甜地，好夾！👍🏻椰香青咖喱雞再配上蒜蓉法包又係最佳配搭！青咖喱裏面有車厘茄、長豆、茄子等... 雞肉都好足份量啊！豬肉生菜包又係我最愛！炒到乾身又唔濕～ 唔算好辣～ 好足料！菠蘿海鮮炒飯炒到啲飯粒粒金黃色，腰果同肉鬆分開上，所以可以按個人喜好添加～ 炒飯裏面有大大粒嘅青口、魷魚同大蝦。鐵板菠蘿炒牛柳一上枱就吸引到隔離枱啲人望住，因為鐵板"渣渣"聲好有鑊氣～ 一夾起啲牛柳粒都差啲焫親個嘴！好惹味～我屋企人就叫咗杯珍多冰，而我就點咗杯 pussy foot~ 其實呢間泰國餐廳都算幾多新派嘅 fusion 泰菜，而且平時喺普通嗰啲泰國餐廳唔會有嘅 cocktail mocktail，呢度都有！有啲似酒吧 mix 泰國餐廳咁！今次我主要食啲傳統泰菜，下次叫多啲朋友嚟可以試多啲唔同嘅新派泰菜！