木子甜品 (已結業)

同朋友打完籃球 ，見到對面有一間叫木子甜品， 立即入去涼冷氣兼吹多陣波經。 佢裏面有嘅選擇大致呢幾類好似中式糖水/芋圓系列/沙冰……我點咗呢個宇治仙草芋圓。上到枱我話嘩左幾聲， 使唔使咁大碗呀。 講番碗糖水， 佢嗰嚿係好似綠茶冰 ，淡淡嘅綠茶味而唔係雪糕。仙草就成個麵咁大碗， 裏面有一啲大大粒紅豆， 淋淋哋又唔會煲到爆曬 ， 味道同賣相都不錯 ， 另外仲有芋圓， 煙煙靭靭 ， 兩隻唔同顏色( 我估係南瓜同芋頭嘅色 )但我又食唔出有咩唔同味 ，廿零蚊真係算平，成碗隊哂，大胃王嘅我食完都話好飽好飽。