C2 Lab

营业中

休息中

之前成日喺Social Media見到好多人介紹呢間餐廳，話老闆以前係酒店主廚，而家自己嚟深水埗開餐廳，希望大家都可以食到高質嘅食物，一直都好想嚟試吓，今日咁啱喺深水埗做嘢，終於有機會試啦。本身想食呢度最出名嘅油封煎鴨髀，但係朋友唔鍾意食鴨髀，咁我哋就叫其他嘢食試吓啦。一開始呢個鵝肝多士已經好出色，佢嘅鵝肝雖然唔係好大嚿，但係味道好好，一咬落去油香四溢，襯埋多士真係好夾。而且佢嘅沙律食落好開胃，我同朋友都大讚啊。因為朋友唔食牛，所以我哋就揀咗呢個豬鞍扒。本身覺得豬扒應該都係普普通通，估唔到佢食落比牛肉更加好食。一上枱已經睇到佢嘅肉質呈現粉嫩嘅粉紅色，食落有啲似牛扒，但係比牛扒更加嫩滑，而且味道好濃郁，唔係好多調味料已經食到好香嘅肉味。呢間餐廳雖然唔係好大，但係佢嘅環境好靚，而且仲好多地方比人哋影相適合打卡，我覺得呢度好適合約會或者朋友聚會啊。