十下火鍋

一大班人慶祝生日最好食乜？ 當然係去打邊爐啦！ 一入到去間餐廳果然令我立即感覺到香港嘅情懷！地同牆上嘅一磚一瓦都有一種八九十年代嘅感覺，而且佢嘅餐具同埋裝修，都好有懷舊嘅味道。湯底飲品同食物都有幾多選擇～～如果有選擇困難症嘅朋友可以考慮下叫呢度嘅二人或者四人餐。點餐之前佢就擺低咗一大盤醬料，有好多配料選擇。飲品方面，值得推介嘅係呢度嘅手工啤酒。叫咗一支伯爵茶手工啤酒，酒樽標籤嘅設計好有香港特色，啤酒飲完落口之後有淡淡嘅伯爵茶味，夠曬特別！湯底我哋叫咗一個鴛鴦鍋，分別有清燉山藥菌菇湯，同埋胡椒豬肚湯。兩個湯底都用料十足，而且夠曬味，煮完嘅嘢食真係唔點醬汁都夠味道！食材方面特別想推介嘅係六合彩(六款丸共十二粒)，同埋海鮮拼盤。六合彩嘅丸粒粒都有唔同嘅餡，感覺新奇又好食！大家食嘅時候要小心會熱親！呢度海鮮用料新鮮，龍蝦鮑魚蚌蜆嘅size都大大件，整齊又乾淨，令人食得安心又放心！其他食材都擺得整齊有心機，整體感覺都衛生， 但係就冇乜特別驚喜。最後，每人都要三百幾蚊，我就認為呢個價有啲貴，食物質素ok，不過份量唔係好夠食。呢個價喺出面其他地方食，應該可以食得飽d！