Shahrazad Lebanese Dining Lounge & Bar

心血來潮突然間想食中東菜，就約咗朋友同我食中環嘅呢一間中東菜半自助buffet。自助食物檯上面嘅選擇亦都好多，首先有我最鍾意食嘅鷹嘴豆泥，而且佢哋鷹嘴豆泥仲有三個唔同嘅口味，包括有出面餐廳都少見嘅煙熏味嘅茄子豆泥。加埋佢哋嘅溫熱比特包一齊食，非常夾。各色嘅烤蔬菜亦係我嘅心水之選，尤其是係烤椰菜花同埋西蘭花，爽爽脆脆又唔會太硬身。食完前菜之後佢哋就開始上蛋類食物及hot Starter, fete cheese炒蛋同油封肉碎炒蛋都很不錯，主要係個蛋夠滑，有濃厚嘅牛油香。.Hot starter方面，炸得乾爽酥脆及表面有大量白芝麻嘅香口咋鷹嘴豆餅就最令我印象深刻，出面乾身，裏面濕潤，很不錯。我哋另外加咗錢add on烤肉，羊肉串同埋雞肉串都非常出色，嫩滑多汁，咁啱同行嘅朋友唔食牛肉，如果唔係試埋佢哋牛肉相信都一定唔錯。.最後嘅米布甸亦都好獨特，香香濃濃嘅米香加上奶粉香氣，令人好飽都忍唔住食多兩啖，而且甜而不膩，冰冰凍凍，幾舒服。