鐵板世家

营业中

休息中

講起港式嘅晚餐，梗係唔少得豉油西餐啦!今次嚟到通菜街嘅鐵板世家。價錢性格比高，非常抵食🤩。店內環境好有港式風味，紅白湯二揀一再配餐包🥣，夠曬經典。醬汁淋落鐵板發出滋滋嘅聲音非常吸引，流晒口水。鐵板煎牛舌拼肉眼牛扒配薯菜 $158牛舌加牛扒，份量超級多。牛舌食落好稔身，再加埋充滿彈性嘅肉質，牛味香濃😋。肉眼牛扒好厚，但切落唔會好韌，輕輕切都切到，肉眼嘅肉味都非常充足，肉質厚實，油脂比例啱啱好，粉嫩多汁🥩。配菜西蘭花同車厘茄簡單焯煮，無過熟，保留爽口感覺，食完感覺清新解膩。鐵板什扒（豬扒/雞扒/珍寶腸/煎蛋）配薯菜 $138什扒餐勝在乜都有，啱晒選擇困難唔知揀咩嘅人🙌🏻。雞扒嘅表皮炸到金黃焦脆，雞肉肉質嫩滑，雞味同醃料嘅調配幾match ，豬扒厚度適中，肉質非常鬆軟，前期準備功夫有落心機，太陽蛋桔爆後，蛋漿流落啲扒度再撈埋飯食好正。珍寶腸仲長過塊鐵板，食落外脆內軟。薯條係用曲薯，係傳統嘅波浪型薯條🍟，食落有薯仔味，外脆內綿，作為配菜啱啱好。仲會送飯後甜品，提子味啫喱加左花奶，口感非常Q彈，再加上花奶令啫喱更加滑🍮，唔會太甜，有解膩嘅作用，好懷舊嘅西式甜品。