卅二公館

营业中

休息中

今日同朋友試咗呢一間歷史都有返咁上下嘅中菜，入邊嘅環境唔錯，睇落似食西餐，唔係一早知係食中菜嘅話真係有機會俾佢呃到。另外側邊亦都有好似酒吧嘅環境，傾偈氣氛一流。我哋一早預訂左熱門嘅叉燒，本身想試吓片皮鴨，不過因為驚份量太多，所以最後冇預訂到。叉燒嘅口感唔錯，不過如果味道可以調到減甜少少嘅話就會更加好，不過純粹個人口味問題，可能有啲人會鍾意。我個人就幾鍾意個海蜇母，非常之爽口。之後食左個鮑魚蒸蛋，我唔係好記得個全名，淨係知入邊有啲肉碎，但係整得幾好食。仲試咗一個煙燻鱈魚，我自己就覺得麻麻然後我哋仲叫咗豆苗，不過因為整得唔夠淋嘅關係，我哋食咗一兩啖就冇食，之後經理好有禮貌問我哋使唔使換其他款式嘅餸菜俾我哋試，我哋就轉左干扁四季豆，味道都唔錯，所以我自己都叫咗一碗白粥嚟配。最後我哋嘅甜品就叫咗兩款，我個人黎講都覺得幾好食，可以再試。總括而言我覺得呢間餐廳都唔錯，雖然有一個菜失左水準，不過因為經理都即刻幫我哋換咗另一樣菜式，呢個服務態度已經值得一讚，同埋其他職員嘅服務都真係唔錯，笑容好好，又有禮貌，我覺得係一間可以再食嘅餐廳。