餐廳好有懷舊嘅感覺，啲菜式都好有特色，等食嗰陣聞到隔離啲嘢食味都流晒口水！
🍴古法金不換炒蜆 $128
啲蜆肉超大粒鮮甜，大粒過平時嘅花甲一倍有多，超厚肉又juicy。
避風塘醬汁加埋啲金不換炒得啱啱好，好惹味！
🍴金勾椰菜粉絲煲 $108
餐廳係用咗大隻嘅蝦乾，椰菜嘅甜味同埋粉絲嘅口感好夾，再加上粒粒肉碎，好滋味撈飯一流
🍴蜂蜜柚子脆蝦球 $108
啲蝦球肉質好鮮嫩，脆皮又酥脆。多數大排檔都係用沙律汁，而今次淋左啲酸酸甜甜嘅蜜糖柚子汁，中和返炸蝦既熱氣感
🍴蠔仔菜脯煎蛋 $98
一個簡單但係好好味嘅小菜，啲蠔仔同埋菜脯嘅咸香味配埋少少燶邊煎蛋真係好夾！
🍴金沙涼瓜條 $58
本身朋友唔太食苦瓜，但係嚟到嘅時候真係好香鹹蛋黃味，所以都忍唔住食埋一份，個咸蛋黃醬非常出色
仲有番薯糖水送添！
