GREEN

同閨蜜平日去食午飯，輕輕鬆鬆傾下偈。餐廳樓底高，枱與枱之間唔會太密，職員都好有禮貌。午餐可以揀兩道菜或三道菜，仲有兩杯嘢飲。先黎一個香草麵包同墨汁麵包，配黑醋，橄欖油，牛油同cream butter。麵包唔夠熱扣咗少少分。飲品要咗氣泡酒同橙汁，仲可以揀西柚汁，西瓜汁，蘋果汁等等。是日餐湯係粟米薯仔雞蓉湯。味道不過不失，質地比較稀。牛油果柑橘蝦沙律。未到平衡得幾好，沙律尚算新鮮。鮮茄軟殼蟹意粉。除咗半隻炸軟殼蟹，整個意粉都有好多蟹肉，意粉醬好鮮味好似龍蝦湯汁咁，分量都好夠，推介。炸魚薯條。薯條係我鍾意嘅粗薯條，仲有一大舊魚柳，炸漿厚度適中，但係男士食可能會唔夠飽。甜品可以自己去蛋糕櫃揀，大約有十款。藍莓芝士蛋糕。 芝士偏軟身，幼滑，唔會太甜。榛子朱古力蛋糕。鍾意金莎朱古力嘅你一定唔可以錯過。總結係，環境舒適，食物中上，係嘆午餐嘅好地方。