金城茶餐廳

营业中

休息中

近期最愛既茶餐廳，招牌飯係椒鹽豬排同生煎肉餅飯, 兩個都係我至愛。 食得太多今次食左個椒麻豬扒飯午餐。 50蚊包凍飲， 個汁好好味，有好多芝麻同洋蔥。 但最最最重點就係， 佢個菜脯!! 中意辣既話一定中意! 食唔到辣既落少少都調到味! 鋪頭亦都有菜脯賣，強烈推薦

係度食左一個馳名生煎肉餅飯，味道不如網上吹噓的好味，非常一般，冇肉汁，肉味亦唔見有，成件事就如普通碟頭飯一樣。但呢個未係重點，或許是自已身子弱，未必同佢地有關，之後即刻肚痛肚痾，痾足一晚，第日仲末清，真係一試難忘，大家有膽量，又或者身體健壯，應該冇事，放心。ps 重點係要提醒一下未去過的朋友，有時食得太多大公司，想幫襯一下D小店，可惜有D小店越做越Hea, 服務態度惡劣，衛生環境更加不用提，門口及店内係貼滿報紙介紹，明星照充場，夠晒明星效應，但服務冇，味道冇。

各位朋友 我建議你地一枝公 兩手fing fing 預左比人呼喝同黑面先好去喇 講真 就算你間野d野食好食到飛天都好 你咁既態度同咁做生意法 唔洗錢我都唔會去食囉 唔係淨係我一個人講 好多食評都有講呢間野態度好有問題 再咁做落去真係遲早執笠 咁著緊d位 到時攬住成舖吉位過世啦一入去有幾張吉枱但係要迫人坐卡位都算我明白你要做生意 我本身都預兩個人坐一邊 我同女朋友各自拎住一個大袋諗住坐寬鬆啲果邊 都唔得 迫我地坐最入窄位 ok fine坐低左諗住放住個袋係對面有客即刻拎走 點知個疑似老版就出聲唔比我地擺 雖然已經講明有客要秒速拎開 佢一句一定有客架喎撻埋嚟 最後我頭也不回咁走左

生煎肉餅飯是我來金城必點的,早餐食得太豐富所以今次食湯米(大家唔想食飯就要試下餐牌的特別介紹有4款湯米,可加錢轉出前一丁,烏冬,米綫。)*雪菜火鴨絲湯米,超級多料呀,青椒,芽菜,仲有唔少鴨肉絲同好香既鴨皮。*XO醬香茜牛肉湯米,有瑤柱同蝦米好足料的湯底,愛香茜的朋友可試試呀。*招牌椒鹽豬扒飯炒底,豬扒醃得好味,肉嫩又多汁,炒底炒得好乾身唔油膩。*招牌香醋豬仔肉飯,豬仔肉炸得好好外脆內嫩,酸酸甜甜既香醋汁令人好開胃呢。食埋自家製的香辣菜莆,撈飯撈湯米爽口又香辣非常正。

到了大圍往茶餐廳吃早餐，二選一，因此玻璃窗前貼著金剛與小儀曾到此拍攝，便選吃這間金城茶餐廳。點了叉燒出前一丁拼腸仔煎蛋，先來奶茶，淡得如熱奶水，茶看看而沖泡了很多回，多士很薄，但外脆內軟，是不錯吃。腸仔一條是冷的，煎蛋一隻不過不失，出前一丁卻非常難吃，湯是其自家制白色無味湯，麵有些怪味，亦很糊，相信是一早煮好後置於一旁，待收單後翻熱便是。難吃的程度是，我只吃了半碗便放棄。話說，沒吃畢，是黎生浪費食物，但個人認為，責任在於煮食者的身上，將食物制作不好，如此難吃，難度就要我照單全收嗎？據說這間茶餐廳的肉餅是有點名氣，但個人覺得一個普通早餐也做得不好，怎麼說會有出色的食品提供。

金城的座位不多，夏天來說，冷氣不夠。但勝在真材實料。雪菜火鴨絲湯米：雪菜不會太鹹，火鴨絲夠多，湯底味道不錯。xo 醬香茜牛肉米：xo醬有絲絲瑤柱同蝦米，令湯底更鮮味，很喜歡香茜的味道，如果更多更好。椒鹽豬扒炒底：這款是鎮店招牌菜。炒飯蛋同油都適中，不會太油膩，炒得乾爽。豬扒肉厚多汁，非常惹味。香醋豬仔肉：豬仔肉炸得外脆內嫩，外面包著甜酸汁，再加上青椒菠蘿等配料，酸酸甜甜，非常開胃。菠蘿比較薄身，厚一點更好。

早幾日去大圍工作，午餐簡左大圍金城茶餐廳食。有驚喜呀！今到去阿姐推介XO香茜牛肉米粉。即管試試！果然無介紹錯！好好味！見到枱面有盒辣菜甫，撈湯麵一流，夠香夠辣，即刻食慾大增！呢間其出名肉餅飯，同日麵好多枱食碟頭飯，食客都照用辣菜甫撈飯，下次再食一定要試下先得！菜甫咁正，會食到個人火辣辣，當然點番罐可樂下下火！阿姐好快就把可樂送到我面前。嘩！配埋可樂，成餐飯就完美啦！美中不足就係....可樂無跟餐價，。湯米+可樂=$60有點貴！

住大圍既朋友仔真係好，咁多好野食。呢間茶餐既生煎肉餅飯聽左好耐，今日黎大圍踩單車特登過黎試下。肉餅好厚好足料，而且煎得啱啱好，唔會煎燶左或者煎得太老，究竟點樣生煎咁厚既肉餅可以咁香口，又煎得熟但係又唔會煎燶左呢？真係好考技巧。👍 不過 $52 碟頭飯好似貴左少少，如果係午餐包埋熱飲會更加好。另外佢個辣菜甫亦都好開胃，攞黎送白飯一流，其實比起十八座狗仔粉既辣菜甫黎講唔算好辣，唔食得辣既朋友仔都可以試下。

最近見到好多雜誌網上報道，講呢一間餐廳位於大圍，佢嘅椒鹽豬扒飯好出色，所以趁我喺沙田放學就過咗去食。大約下午一兩點左右，入到去餐廳已經好多人，要同人搭枱坐，一坐低就叫咗個椒鹽豬扒飯炒飯底，另外再叫佢比較出名嘅肉餅飯。但係估唔到啲飯嘅份量都幾多，仲好大碟添，就算我一向比較大食、大胃王啲嘅都食唔晒。椒鹽豬扒飯比我想像中差小小，我以為佢豬扒炸得好香脆，而且仲有少少辣汁，但係啲豬扒就比較林身少少，雖然好易咬口，但係就冇乜質感，所以我覺得一般，冇出面講到咁好食。反而個肉餅飯，佢個肉餅用煎嘅烹飪技巧去煮，所以食落口有外脆內軟嘅感覺，而且肉餅好大塊好厚身，都幾好味。不過下次會再試過第二啲碟頭飯，都算不過不失。

金城好早就收鋪，襯男朋友放星期一，我地就三點左右入嚟食肉餅飯啦！大大份既肉餅夠厚度而且肥瘦肉適中，咬落口有質感；煎得香口都可以保持到肉汁，彈牙有肉味，餸飯真係一流！記得要食埋個辣菜脯，爽口夠香辣。而男朋友碟蜜椒雞扒飯就真係有驚喜，估唔到既好味道，配菜洋蔥紅蔥炒得爽脆；調味做得好好，個蜜椒做到有焦糖香甜，每件雞都沾滿醬汁，雞又一啲雪味都無！加埋杯凍檸茶要成六十幾蚊，有人覺得好唔抵只係間茶餐廳，但我覺得哩度既一碟肉餅飯其實夠兩個女仔食，就算一個男仔食晒成碟，我肯定佢會嗌飽，但唔係扒白飯扒飽個人呀！再者唔駛成日係商埸食埋啲一式一樣既野，就算貴少少又如何，仲有隻貓貓同你玩咖

呢間茶餐廳係大圍係頗有名氣，但質素就名過於實。首先，食物方面，雖說不錯，但完全唔值得呢個價。Lunch時段，一碟椒鹽豬扒飯加凍飲，索價$63，就算唔飲野都要50幾蚊。我係中環嘅茶餐廳都係食緊50蚊有找有野飲嘅餐，金城何德何能以呢個價作收費？其次，員工質素，何其惡劣。我差不多2點去食嘅時候都唔比我坐卡位，但我眼見3大張卡位都無人坐。最後我都係坐左係近門口細圓枱。而門口則長開，但對住馬路。於是我就叫員工幫幫手關門，佢竟然答我: 一係你坐入去啦，我係入面好熱架！！ 我即刻火都黎，入面熱點解唔開冷氣唔開風扇？要食客食塵都唔想用電？係咪因爲用電又會搞到開支大左？於是我全程就食風食塵再食飯。再者，店內環境非常逼，d員工行路又唔帶眼，一餐飯食左40mins左右，比員工撞到十下10次！最後，埋單時候，我比左1蚊毫子(即4個2毫同2個1毫)，個收銀呀伯話唔收，咁算！我比100叫佢找，順道同佢講聲話唔收毫子係犯法(當然我唔會咁得閒走去告佢，我好心提下佢，同我都知道好多鋪頭都唔收，所以都無理佢)。但佢即時破口大罵！不斷話我又講說話比我聽！總結: 今餐食到食肚氣同成肚塵，請我都唔會再黎呢間低質嘅茶餐廳！

因為工作關系, 最近經常要在大圍出入.一支公食飯唔係快餐就茶記.今次黎到金城茶餐廳試下個生煎肉餅飯.鋪內地方不大, 坐得比較密.中午時候若三五人黎食飯可能要等位, 一支公的我省卻了這個煩惱.生煎肉餅飯(連熱飲)由坐低落單到上菜全程不用五分鐘.須是預製, 飯同肉餅的熱度卻十足.份量亦十分多, 細食的朋友可考慮少飯.熱奶茶茶味較特出.肉餅肥瘦肉夾雜, 眾多香味之中比較特出的是淡淡的薑味.表面煎得十分香, 因為肉餅厚度足夠, 中心仍有肉汁.辣菜脯辣度十足, 半匙足夠送一碟飯.怕辣的朋友請淺嘗.在我面前不會有剩飯出現.順帶一提店內有貓出沒.喜歡/不喜歡動物的朋友請留意.

趁過年諗住少人d！就去食金城啦！點知都係咁多人！好彩都搵到位！生煎肉餅飯好正啊！勁快就上台！肉餅夠哂大大舊！成塊面咁大舊！飯亦都好多！仲有條菜俾你！肉餅煎到好香又好脆！好正！肉餅仲有好多肉汁係度！配埋飯就唔會乾啦！肉餅味道咸咸地！又好有豬肉味！係金城必食既辣菜鋪！又香又辣又爽口！識食一係食肉餅配辣菜鋪食！本身肉餅得咸咸既香味同肉味！但加埋香辣既肉餅又唔同左味！味道好正！同肉餅好夾啊！一定要加埋菜鋪食！

《高CP值生煎肉餅飯🐷VS無限塊椒鹽豬排飯 》生煎肉餅飯 $50簡單既食物但做得出色絕對唔簡單❗🐷首先份量一D都唔野少，真係手板咁大塊肉餅，勁厚身。肉餅確實係好彈牙，感受到手打肉餅既張力。生煎既肉餅，做到外面脆卜卜，入面將肉汁鎖實入面既肉仍然好滑溜，肉食肉獸男首選❗❗椒鹽豬排飯 $50呢碟椒鹽豬排飯一上枱我只係見到滿滿的豬扒山，D豬扒多到數，食極都仲有😝豬扒拍打得好夠淋，加上葱、蒜、辣椒爆炒，椒鹽味道夠香口。雖然無汁送飯，但係佢既味道已經好夠下飯，完全唔使再加菜莆😍😍不得不提既係呢度既特製菜圃認真惹味，味道香甜，唔覺唔覺，食多左會覺得辣有勁道🔥

去咗金城食嘢.餐廳入面貼咗好多勵志金句,例如係呢句"是非天天有,不聽自然無".我哋叫咗兩份餐,揀咗熱奶茶同凍奶茶,茶味同奶味算平均.沙爹牛肉通粉嘅通粉煮得稍腍,沙爹牛肉嘅份量就唔算少,肉質軟滑不失肉味.火腿奄列蛋皮煎得唔嚡,中間仲有蛋汁流出,火腿絲又唔會太鹹,夾晌搽咗牛油嘅白方包嚟食,即刻變咗做火腿蛋三文治.肉餅飯嘅肉餅兩邊表面煎得焦脆,中間鬆化有肉汁,飯量足夠,仲跟埋條菜心晌度.辣菜脯爽口,又香又辣,不論係配飯抑或湯粉麵皆惹味,真係幾好撈飯.講真呢度嘅服務的確一般般,尤其係食客多嘅時候,要舉手好幾次先得到回應.如果唔係因為佢哋嘅辣菜脯,我諗都冇其他嘢更吸引到我喇.