榮記粉麵

营业中

休息中

牛腩豬紅腩汁粗麵 $36足料配料加上幾條菜，香濃腩汁，掛到粗麵，好食！牛腩有幾舊偏瘦左少少，但煮得夠淋，係數一數二好食又抵食既車仔麵！蘿蔔魚腐腩汁油麵 $36呢度既蘿蔔無得輸，超甜超淋，又冇渣！一定要叫蘿蔔，魚腐大大料，索左腩汁既味道，非常唔錯！加上醋同辣椒油，油麵有咬口，正呀！。📍滷水墨魚頭都非常爽口！📍辣油香口好味，夠辣，落落去夠重口味又好食！📍銅鑼灣有唔止一間榮記，通常去渣哥對面綠色果間。

基本上每次去到銅鑼灣都會想食榮記個車仔麵，以前冇疫情任何時候都要排隊，依家亦都好多人叫外賣，次次都係食佢個墨魚頭同埋豬紅，但有時候墨魚頭會賣晒，就會食魷魚鬚。今次都唔例外，叫咗墨魚頭豬紅油麵，好想叫埋雞翼尖，不過算啦食唔晒，而家疫情關係外賣-$2，$35埋單。不過今次啲豬紅冇咁滑，可能因為疫情關係冇咁多人食，感覺冇咁新鮮，記得以前堂食，成日有人叫淨豬紅。其實重點係佢個湯底，好濃嘅牛腩汁，佢仲會送埋啲菜，加埋個汁真係好正。

成日見到呢間咁舊既麵店排晒隊，就同朋友試下佢，一食就連續食左兩日😂即使係三餸/四餸都好足料，碗好細但係佢會塞到啲餸好滿😍推薦大家嗌豬頸肉、墨魚頭、墨魚丸呢啲都係出名有好好食！個秘製腩汁都夠曬濃價錢係呢一頭來講亦都唔算貴，又好足料！嗌小食嘅話，魚皮或者雞翼尖都好正，雞翼尖超入味！P.s. 佢真係麵多過餸，好肚餓又鍾意食澱粉嘅未必夠飽，可能要加底！

今日自己一個人食所以普普通通食一個車仔麵，之前見過有人介紹呢間舖頭，所以過咗黎試一試。佢有三間分店，我食開呢間。😂墨魚頭蘿蔔冬菇米線 $44每次嚟到必叫佢個墨魚頭因為好大件好爽口彈牙！🐙超推介！而佢既蘿蔔切到一粒粒方便入口而且非常甜又冇渣☺️ 冬菇就好似平民價鮑魚咁😂份量都OK，最緊要係佢啲冬菇好滑。🤤不過米線份量偏小同埋佢碗車仔麵裏面會有少少通菜俾你食。之前都有食過佢嘅咖喱墨魚頭都好好食，不過偏辣（唔食得辣嘅朋友仔要注意下）！佢嘅墨魚頭好食到我會就咁一碟咁叫🤣佢嘅咖喱汁好惹味！唸起都想再去食。佢嘅辣汁係自己加，但少少就已經好辣好辣（呢個注意下，唔好一次過落太多😂）

以前成日嚟嘅榮記車仔麵不過而家少咗嚟因為開多咗好多間都幾好食嘅車仔麵喺銅鑼灣包括永年車仔麵。只係咪因為肺炎關係今日嚟到完全唔使排隊直接入去order就可以啦！我叫咗四餸車仔麵，豬皮，冬菇，牛筋，牛肺。好少地方有牛肺食，所以對我黎講就試下啦！雖然今日唔使排隊但係食落去嘅感覺好似冇以前咁好食而我哋都冇點到雞翼尖。不過都見佢哋搞搞新意思，小食有墨魚咀唔知係咪太熱我地真齋食完麵就閃。希望肺炎後再黎會好食返啦！

好耐無入去食車仔麵，今日忽發心血來潮叫了韮菜雲吞、魚腐、蘿蔔油麵，麵底同個湯保持水準，個雲吞依家無佐以前咁好味，叫野食時睇緊餐牌員工不耐煩，成間鋪嘅員工都黑面，態度有待改善！

今日去咗平時好多人排隊嘅榮記粉麵食我哋七點幾去到唔使排隊直接入咗有位坐我叫咗雲吞魷魚鬚河粉男朋友叫咗雲吞牛腩米粉再叫咗滷水雞翼尖同埋一碗西洋菜（視乎返嗰日有咩菜）基本上所有嘢都加咗牛腩汁但我覺得個牛腩汁偏鹹食物都OK嘅價錢親民係環境逼夾左少少坐得有啲唔係好舒服🙈🙈

榮記粉麵是我最愛的車仔麵店，沒有之一 食物 5/5每一次都是叫三拼米粉，這次選了豬紅、豬大腸和雞翼尖，再配以腩汁湯底和通菜，很適合我的口味。當然，該店有不同粉麵的款式供大家選擇，也有很多款菜配搭，因應不同人的喜好。這次吃不到該店招牌之一的豬紅，有時候就會售罄，可見其受歡迎程度！特別喜歡這裡的豬紅不會一夾就碎，而放入口中卻很嫩滑。雞翼尖我亦覺得非常惹味，鹵水汁滲入肉汁，入口超香，有時候會忍不住要再單叫一碟。豬大腸是我的至愛，一直覺得做豬大腸是一定要把它清洗乾淨，好不然很容易有其他味道，欣賞該店的豬大腸很乾淨和入味蘿蔔也是不錯的選擇，清甜入味 環境 3/5該店的環境稍為擠逼，由於座位不多，所以彼此會坐得比較近，人不多的話也一定要和別人拼桌，但正是港式車仔麵店的特色。

銅鑼灣車仔麵選擇非常多，榮記粉麵還是第一次食。速食之選，3餸$43，唔包飲品。坐位唔多，空間唔大，內裡圓枱盡坐四人。 車仔麵要有嘅選擇，都齊全。店鋪推介小食有咖喱辣醬豬頸肉、墨魚咀和墨魚頭。云云餸菜，來一個焦點小食之選，方便客人解決選擇困難症。今次點左豬皮、冬菇、墨魚頭夾米粉。麵底不算多；餸菜都煮得入味；不馬虎。墨魚頭厚肉爽口，辣醬配搭算惹味。當中也有伴餸西洋菜，平衡健康飲食。可惜味精感頗重，飲杯豆漿岩岩好。

係銅鑼灣大既我，榮記其實係我記童年回憶，中學年代基本上係個個星期都食，學生妹年代貪佢夠經濟，又好味，最鐘意係佢個豬紅，入晒味，滑滑的，但近年因為lunch time時間兩間都排長龍，再加上伙計門招待方式真係不敢恭維，所以已經好耐冇食點知今日早左放lunch，1245行過，唔洗排隊，一於回味一下叫左4個餸米粉，有我最愛既豬紅，豬腸，牛筋，菜湯底好濃，有南乳味，不過太咸豬紅一樣係咁滑，但係...有D酸味...怪怪的...雖然有好多舊，但...食唔晒...我既回憶破滅了...豬腸肥肥的，有好多粒，keep到水準牛筋燜得夠冧，不過同豬紅一樣有酸酸既味道菜只有生菜同通菜揀，我揀左生菜，唔新鮮，好老總結真係冇以前咁好食，唔知係咪因為咁，所以唔洗排隊...一個4餸面，要差唔多＄50，坐得真係唔太舒服，但食得車仔麵都預左，伙計招待方式，冇變過，但最重要既係食物質素跌wak了，真係覺得好可惜....

今日去左買兩碗外賣，食到一肚氣。拎完外賣上車發現個碗底係穿，啲湯漏晒出黎整溶埋個袋，搞到我成身濕晒。返到屋企仲要發現我叫河粉佢就俾米粉我，成碗粉又碎到夾都夾唔到。真係以後都唔會再幫襯！

好耐無食過榮記，一支公出開銅鑼灣去食啱晒。一向最鍾意佢個腩汁湯底，因為夠晒重口味。每次去必定加埋個可樂，都幾懷念以前既玻璃樽裝。兩點鐘去居然仲有人龍，一支公等左幾分鐘就有位，不過店員指示好唔清晰，最後自己走左上樓上搵位，仲要坐入到最盡頭既死角，連想周圍望既空間都無，真係食得好辛苦。魚腐一向都勁鍾意，比出面一般既軟腍同大大舊，索晒汁勁入味。墨魚頭夠爽口彈牙，可惜最令我失望係個牛筋，實在係太硬，硬過你條命，最後有d 都無食到。湯底同河粉都不變，變在係粉量好少了，不埋單$50 都仲可以接受。

由細食到大嘅 榮記粉麵🍜 呢晚 #小秘書 又嚟幫襯😋 好好彩唔使排隊一去到就有位✌🏻 以往我都好懶，求其叫個「細什米」就算，不過就每次都見到 #隔離飯香、後悔自己點解唔叫呢啲同嗰啲😅 其實只要細心望下個餐牌，仲有好多其他 #配料 可以揀，唔使食嚟食去都嗰幾味🤨 呢次我叫咗 #墨魚頭、#雞翼尖、#豬腸、仲有 #牛肚... 唔知係咪自己口味變咗定係點，雖然「榮記」嘅滷水汁依然係咁濃味、食物亦滷得好入味，但係唔知點解佢啲 #米粉 硬係要碎濕濕咁，湯又唔夠熱😌 而且我覺得油膩感比較重👉🏻👈🏻 搞到個肚成晚都好似滯住咁... 點解嘅？🧐

之前一直都有留意到openrice好多人話呢間粉麵好食，今晚食完個正餐發覺唔係好飽，所以就黎食「宵夜」啦!8點幾9點黎到餐廳入面都仲係好多人，岩岩有人埋單，所以唔駛等就有得入去啦!因為唔太知邊D好食，所以看看餐牌，點了幾款餸菜試試!豬皮豬紅韮菜雲吞米粉，賣相跟想像中有差別，湯底味道比較淡，韮菜雲吞味道唔係好濃，不過豬皮夠咖哩味，而豬紅幾滑幾入味!米粉就正正常常，唔會太碎!牛肺牛肚河粉，牛肺都幾入味，口感幾滑，牛肚唔會太韌，整得剛剛好!隨這碗粉仲附有幾條通菜!如果加埋這裡的辣油會更惹味!總括黎講，味道真係冇想像中咁好，或者我會考慮食另一間分店試試!

以前呢間野串到碼頭咕喱。地方又迫，基本上要人格降Grade才可以堂食係好多銅鑼灣人都應該知道。但點解都好多人幫襯，點解？我轉頭講其中一個點大家聽。今日幫襯他們的態度冇以前咁差。一坐低我就叫個大雜麵食下先。因為我哋從來都好怕揀嘢食。有人話點餸食仲抵食，我就未試過，下次可能會試吓。點解佢哋串都咁多人幫襯，因為佢湯底真係好。但今日所試，湯底走了樣，唔知道咁啱定咁橋。下次搵日再有機會再試下。再報告比大家知！