沖繩二段料理 (荷里活廣場)

营业中

休息中

叫號安排極差，10秒內叫5個號，根本冇心比人入，我個號只過30秒，已經唔比入，仲好冇禮貌黑晒面咁講。如果想人現場等，咁佢個掃code系統比人用手機mon住叫號其實冇咩用，我都手機見到到左即刻去到都趕唔切。建議寫明「請不要離開，現場排隊等候。」果日星期五夜晚7點去到，等左成個鐘到8點，竟然講唔比入。我同家人都已等到好肚餓。本身之前一直都有支持lee間餐廳，但係今次既服務體驗真係令人極度憤怒，香港餐飲業之死因。

沖繩二段料理的好料理首先店舖的位置鄰近地鐵站, 就在荷里活廣場裡, 對我而言是地鐵直達﹑交通便利之選。去了店內點了一個餐, 十分滿足, 二人吃一個餐都很夠飽。我大約五時半左右去這店吃晚餐, 很好的是根本不用等,  亦不用排隊便可以迅速入到店內, 店員的一流控制和把關做得很好。還安排我們二人座卡座, 很舒適, 冷氣亦適中, 一入去便很享受那種悠閒的氛圍, 因為食客不會很多, 很寧靜, 一點也不嘈吵。想不到正餐豚肉肉味噌烏冬鍋加上甜品的價錢那麼超值。豚肉肉味噌烏冬鍋很大鍋, 保溫功夫做得很好, 不但吃的時候很燙, 食用過程中食物也沒有變涼而影響食物, 讓食客能吃到食物最美味的一刻, 店家可謂功不可沒, 就是因為容器選擇得宜。豚肉肉味噌烏冬鍋的味道亦相當好, 吃到味噌的香味, 跟豚肉完美搭配, 烏冬爽口彈牙, 麵質很好, 吃一口烏冬同時喝一口湯, 很好吃, 濃淡得宜, 味道天然又健康, 因為沒有覺得加了甚麼味精。然後還附帶一個小食: 南蠻雞, 分量不少, 可供三人食用都很足夠。這小食的味道亦相當出色, 並不是一般炸雞, 而是口味獨特、外脆內嫩的日本風味版本，店家用特製醬汁來調味，味道香濃,

今次同朋友去咗間日式餐廳食左個下午茶，每一道菜都好有驚喜！特濃蕃茄烏冬鍋湯底濃郁，帶住天然蕃茄香味，微辣，烏冬滑溜彈牙，係用日式烏冬烹調，吸晒湯底精華，每一啖都好有蕃茄味！大阪燒醬雞肉餃子外皮煎到金黃香脆，內餡雞肉多汁，配上大阪特製醬汁，味道層次分明。明太子烏冬鍋帶有微微鹹香，明太子同烏冬完美結合，口感細膩，唔會太膩。黑糖檸檬雞就好特別，雞肉外皮脆卜卜，黑糖同檸檬味道互相中和，甜中帶酸，令人一試難忘。最後嘅沖繩海鹽焦糖雪糕冬甩係必點嘅甜品，甜品部分絕對係亮點，冬甩外脆內軟，配上海鹽焦糖雪糕，鹹甜交錯，食完好滿足。整體嚟講，呢間餐廳無論主菜定甜品都好有水準，環境舒適，服務貼心，非常適合朋友聚會或慶祝！👍

🩷好鍾意食呢間日本餐廳！覺得d食物比起Megabox嗰間更加高質！環境都好靚，有棵發光紙神樹喺中間，可以圍住佢食。而且好多人流🤪好彩下午茶時間去唔使等咁耐！❤️第一次試番茄芝士雞咁match！拉絲🫕雞雞食得好過癮～配搭起蕃茄🍅嘅酸甜令芝士🧀唔會太容易食膩，所以我後邊仲可以食到好多甜品🥹最重要係佢個雞！一啲雪味❄️都無但好有雞味，而且超級嫩同juicy🌼😂，超級出色❤️‍🔥🧡牛肉烏冬肉倍增😎👍🏻正常水平，個驚喜落咗喺🐟醬油鯖魚，竟然連小食都係即刻烹調，魚皮脆，冇乜腥味，趁熱食💚今日先發現新推出咗獅莎燒，個樣真係好Q好想一啖食咗佢！四隻味好難揀，所以一次過食晒全部🤗綠茶同芋泥都穩定發揮，中間仲有啲煙靭嘅麻糬，好啱我！！！最得意係有咖喱味鹹嘅甜品，芝麻味就最得呀爸歡心，好香🥰呢個真係要趁熱食叫起！🩵個冬甩雪糕套餐已經包咗～粒粒波子都係繼續咁煙煙韌韌，配埋焦糖同雪糕，飲返杯烏龍茶，完美！😚如果你想食埋個布甸都可以，少少乳酪味，絕對唔會太heavy！🤎加$12就可以upgrade抹茶牛奶，偏向奶味重

🍛 黑糖柚子醬油豚肉蒸飯（$56）佢有分兩個size,有正常同增量裝，今次我叫左正常；唔好睇個蒸籠好似好大，但其實裡面好淺，豚肉有3-4塊，不過不失，唔係特別嫩滑亦唔係特別嚡口，飯嘅份量比較多，醬油食到柚子嘅酸但唔係好食到黑糖味，同普通柚子醬油差唔多🥟 蜜糖芥末雞軟骨餃子餃子有4隻，都算幾大隻，餃子皮比較厚，包嘅餡料份量都足嘅，不過唔太食到有雞軟骨🍋 凍黑糖檸檬茶（+$6）檸檬茶係飲到用黑糖沖嘅，味道同平時嘅檸檬茶有唔同🦁 沖繩獅莎酥冬用雪糕（+$9）獅莎酥酥脆，加上灑有紫薯粉嘅雲呢拿雪糕同煙靭嘅波提冬甩，冰火交融，唔錯，唯一要挑剔係等上菜嘅時間比較耐💰 同埋提提大家埋單嘅時候要對單，因為餐廳將另一枱客嘅單同我個張撈亂左，同埋用左少少時間先對得到，差啲收多左我一倍錢🙃

成日都會為咗冬甩🍩嚟食。食一個完全唔夠喉😍😍。🍽️2人前3品定食 $239🔸黑糖柚子醬油蒸飯 南蠻炸雞柚子醬油（ゆずぽん）嘅味道好清爽，再加埋飯素其實好味道到可以食晒成個飯。南蠻炸雞係嫩嫩嘅雞腿肉，雞皮仲好脆💕。🔸牛肉壽喜燒肉味噌湯烏冬香甜壽喜燒+類似滷肉嘅肉味噌，出奇地好食喎。肉味噌簡直係惹味嘅秘訣。烏冬滑滑地又冇酸味。🔸芝麻手羽先🔸芝麻雞軟骨Comfort food級數嘅香脆炸物💕。🔸沖繩海鹽焦糖布甸冬甩雪糕 +$9冬甩煙煙韌韌，原味口味唔太甜，配上海鹽焦糖汁甜度啱啱好。布甸係乳酪味，酸酸地好清新。🔸沖繩獅莎酥配雪糕獅莎酥係類似硬身蝴蝶酥嘅口感，可愛造型加晒分。🔸抹茶牛奶🔸無糖烏龍茶

比沖繩料理幾隻字吸引到，見到環境開陽幾舒服就試下啦～佢係套餐形式，可以自己揀主食、菜式、餐飲，仲包donut雪糕!!!今次揀左清清地嘅竹籠豚肉蒸飯 配柚子炸雞。白飯底 面頭有兩大塊豚肉，再灑上味素，好新奇嘅配搭😀😂柚子炸雞有4舊，分量偏細，但柚子醬幾多，上台仲熱辣辣😗甜品donut雪糕係波提donut，好chewy好有咬口♪( ´▽｀)放上雲尼拿雪糕同海鹽焦糖醬，有冰火交融嘅感覺🤎食完非常滿足。

呢間冬甩我就幫襯過好多年，因為呢個口感質素香港好難買到特別係個焦糖醬，加埋Yogurt一齊食，簡直畫龍點睛！呢間黑色衫既高大男經理好helpful，好鍾意小朋友，成家落黎食又會照顧到小朋友需要，又好細心咁解釋menu比老人家好少寫食評真係要讚一讚今時今日既服務態度買少見少👏🏻👏🏻呢間既米唔知點解特別還是，好有去到日本既感覺，味增肉燥飯好食😋！荷里活廣場太多日本野食，食曬1round我就覺得呢間最掂啦

$60下午茶の奧義——「正餐」縮水成「下午茶size」，完美演繹「食兩啖就飽」的職場哲學。畢竟附近上班族嘅人生目標就係：快啲食完，快啲瞓覺。餐廳深明大義，直接將正餐壓縮成掌心大小，等你可以5分鐘KO，爭取寶貴的45分鐘「閉目養神」時間。 (尤其是以上個牛肉飯，原裝正版未郁過就係咁樣)加$20換甜品？當然要加！橫掂都食唔飽，不如用糖分麻醉自己，等個腦以為「我已經被滿足咗」。至於味道？其實唔差嘅，波堤冬甩加埋雪糕，焦糖醬，正！ (整個擺盤，有三滴送既)服務？半自助式就係「你自己動手，豐衣足食」嘅代名詞。要水？舉手 1分鐘；要紙巾？不如自己帶。反正$60蚊嘅交易，包你個肚唔包你個腦，合理過合理。 結論：適合「追求效率」嘅打工仔——食完唔會記得味道，但會記得「我終於有得坐低」。性價比？當係比錢租個位抖氣囉！ (幽默版)

下午茶時間行街行到攰攰地，響鑽石山荷里活廣場想搵個地方坐吓，就發現咗一個幾抵嘅下午茶餐。呢間餐廳之前食過喺紅磡間舖，啲嘢食唔錯，不過最深印象嘅都係佢嘅冬甩，原來喺鑽石山都有分店。佢嘅下午茶定食有好多配搭，鹹嘅甜嘅都有。我就嗌咗2層冬甩雪糕乳酪布甸配海鹽焦糖冬甩雪糕。呢個餐計埋加一只係$65，就可以食到三件冬甩、兩球雪糕加多個乳酪布甸仲有杯嘢飲添，兩個人食都好飽。佢嘅冬甩夠煙韌，加上又鹹又甜嘅海鹽焦糖醬好惹味，乳酪布甸好滑又唔太甜，雪糕就正常發揮啦。餐廳唔算好多人，坐得好舒服。

之前喺油塘食過呢一間餐廳，印象OK，今次試下鑽石山分店。 食後感：主打滿足，食物偏甜，不過不失。 訂位/入座： 平日晚市六點半入座好好彩唔使等。 但我見已經要攞飛。 座位/環境： 我哋四個人入座，就有一個卡位。Ok寬敞嘅，但就絕對冇位擺自己嘢。 如果你有背囊或者手袋嘅話，放埋係櫈就會有少少迫啦。 其他二人或一人食客，就會坐喺一張大嘅枱然後有膠板擋住。 上菜： 手機落單。上菜都算幾快呀，不過有點甜品嘅話，記得要同店員講幾時要上。 （就算我手機冇揀後上甜品，佢都冇跟餐上。）食物：我就叫咗個自由配套餐，明太子烏冬加布甸，同埋一個冬甩嘅雪糕。 睇落果烏龍好似好大份，但實質果碗就好淺。畀定個心理準備，唔好期望好大份。 味道就係少少辣嘅明太子，唔係嗰種creamy嘅口味。烏冬就幾煙韌。 炸雞就唔錯，不過我唔睇理解布甸作用係乜，因為兩者唔太夾。 朋友就話布甸偏酸，但我都接受到嘅，因為雞同烏冬都有少少偏甜。 呢個應該唔會就係佢哋嘅配搭吧。 甜品方面，雪糕冇特別啦。但係冬甩食落係煙韌有飽足感，配埋個雪糕，一軟一韌一甜一咸就唔錯！ 買單：電子落單，但記得要去counter埋單。 四個人食咗差唔多五百蚊有加

週末去荷里活廣場食午餐，需要等幾張枱先入座。餐廳以手機落單，午餐自由配有主食、炸雞/鍋物、甜品及飲品，選擇幾多🤩 主食揀咗🍅特濃蕃茄烏冬鍋($106)及🐂肉味噌壽喜燒牛肉烏冬鍋($121)，食物以熱鍋盛載，味道正正常常，都唔錯小食揀咗🍮沖繩海鹽焦糖布甸雞，第一次食炸雞配布甸，將布甸放喺炸雞上一齊食，整體味道甜甜地，口感軟彈，炸雞微脆，味道出奇地夾，好有特色😆 另一款揀咗蜜糖芥末雞🐣見好多食評推介甜品，果然名不虛傳👍🏽 🍩沖繩海鹽焦糖雪糕冬甩口感煙韌，外層微暖，跟雪糕一齊食，帶嚟冷暖交融嘅體驗😋 餐飲有無糖烏龍茶

行經荷裡活廣場，見到門外告示嘅套餐幾吸引，便入去食自助下單，點了一個定食$82(堂食加一服務費，總數$90)叫咗黑糖檸檬醬油豚肉蒸飯，南蠻雞，無糖熱烏龍茶，沖繩海鹽焦糖雪糕冬甩無糖熱烏龍茶，茶味淡，但無糖飲到甜味🤔，等了一陣食物就來，賣相幾好！黑糖檸檬醬油豚肉蒸飯，飯夠熱，食落有點淋，豚肉得飯面上嘅幾塊😅，食到少許檸檬醬味，幾清新，味道唔錯👌南蠻雞炸雞食落熱辣辣，而且每件都加上酸酸地嘅沙律醬，食落幾開胃，炸得剛剛好，唔會太乾，食落外脆內軟，好食😋沖繩海鹽焦糖雪糕冬甩雪糕係雲呢拿味，冬甩係煙煙靭靭嘅口感，配上焦糖醬，都幾夾，幾好食👍整齊來講，環境唔錯，食物都幾好，份量都足，但食個午餐，接近一舊水，而且要自助下單，自己出門口埋單，要收加一服務🤔

進入餐廳隨即有筷子和匙浸在杯上和QR Code手機落單。點了一個定食：蜜糖芥末雞明太子櫻花蝦蒸飯+無糖熱烏龍茶追加 沖繩海鹽焦糖雪糕冬甩(+20)首先來了一杯飲品，温度足夠，但略嫌太濃。等了一段時間食物終於來了，賣相不錯！先吃蒸飯，太失望了，飯太淋可能焗了一段時間，但味道尚可；不過最驚喜的是炸雞，醬汁調得很好，味道適中，炸得剛剛好不會太乾，而且還有肉汁，吃到最後一舊還是外脆內軟的。最期待的甜品(後上)也來了，雪糕正常，冬甩比以前差了少許；焦糖醬和兩者都很配合。記得第一次在荃灣吃的時候是很好味很有驚喜，但現在沒有了*堂食加一服務費，外賣減💰10*付款方法：八達通、現金、信用卡

放工和友人飯聚，因為友人鍾情日式料理，所以選了這間餐廳用膳。定食套餐包括主食，小食及甜品各一份。食客可以自由配搭，而主食和的小食的選擇頗多，有三至四款蒸飯/炊飯和烏冬。小食則有數款炸雞或鍋燒料理可選。因為想食讚岐烏冬，所以點了明太子烏冬鍋。出於好奇，小食點了沖繩海鹽焦糖布甸雞。明太子烏冬鍋的烏冬麵條口感不錯，煙韌彈牙。明太子的味道不夠濃郁，但整體而言烏冬鍋算是可口。第一次品嘗炸雞配布甸，感覺沒有想像中好。布甸質感和味道均似乳酪，曾經嘗試一口炸雞一口布甸和炸雞及布甸一口吃下去的食法，但都覺得兩者並不是很匹配。雖然不是很難食，總之覺得d味同texture都唔多夾。偷吃了友人的蕃茄鍋和芥末炸雞，兩樣食物都比我選的好吃。興幸甜品選左沖繩海鹽焦糖冬甩配雪糕，同樣是沖繩海鹽焦糖，冬甩就好吃多了，為是次晚餐寫下美好的回憶。冬甩煙韌很好吃，難怪在等位時，見到不斷有人外賣冬甩啦。