owletcc的個人專頁

呢間係旺角的樓上cafe，上到去有好多應援佈置，都預左食物包含打卡價，但今次真係伏伏伏，事後睇負評發現全部都係我的心聲。主菜全部收過百元，卡邦尼意粉(連加一$119)味道正正常常，不過幾啖食曬。海鮮窩夫(連加一$152)非常細份，配料只有少少肉絲+蝦仔。落街廿蚊食件格仔餅無咁嬲🙃。凍朱古力(連加一$62)普通過唔普通，餐廳毫不吝嗇地加冰，溝到質地偏稀。幫襯連鎖茶記加幾蚊就有杯特濃朱古力會開心d。再講下環境，窗邊擺滿好多毛公仔，睇落黑蚊蚊。我容易鼻敏感，就費時坐近個邊了。總結，食物質素非常一般，完全唔符合個價錢。如果我之後做應援，都唔會考慮呢間餐廳。…查看更多

久慕大名，幾年前早已聽過餃里個名，餃里都算係香港餃子界入面薄有名氣，喺只有屯門碼頭總店的時候已經聽聞口碑幾好。普遍有講法認為餐廳開分店後會令食物質素下降。現時餃里有七間分店，遍佈港九新界。故是次抱住好奇的心情，初試餃唔餃得掂。「椰菜鮮肉煎餃」(9隻)雖然話係煎餃，但比起卜卜脆，餃子皮咬落去更多既係煙韌。椰菜碎無乜菜味，但好爽口。豬肉餡唔係juicy個種，不過有肉香+鹹度適中。另外醬料配有柚子醋同辣菜脯。柚子醋酸酸甜甜，非常開胃。至於平時只能食十小辣的我，表示辣菜脯超級超級辣，但食得出有浸蝦米香。…查看更多

先此聲明，差唔多個個月都有幫襯意樂美孚分店，試過餐牌上好多樣嘢食都唔錯，但最近水準唔太穩定，係食評講出嚟希望有改善。午餐時段叫咗「日式燒汁溫泉蛋牛肉丼飯」，諗住咁易煮嘅嘢穩穩陣陣。一打開外賣盒，牛肉份量唔算多，唔夠送飯。算啦🥲 淨食白飯都飽肚，點知啲飯好似落唔夠水，每一粒都好硬（硬過隻紙匙羹），咬到好攰。然後個飯最驚嚇係......當我篤穿隻溫泉蛋嘅時候，原來得蛋白，只知蛋黃失了蹤，想搵少少蛋汁撈飯都冇😭 完全唔知廚房佬點打蛋搞到咁，估唔到牛肉飯可以咁伏。…查看更多

最近成日幫襯嗎哪，綜合8次外賣經驗，覺得佢出品唔太穩定，先講缺點：❎燒鵝唔止一次畀背脊位，肉少得可憐，女仔都唔夠飽。❎菜心見到幾條菜心都攝住發泡膠粒，即係洗得唔乾淨。❎試過叫瀨粉但畀錯白飯。❎個人口味問題，燒腩仔同燻蹄有少少豬臭味。不過order咗咁多次，係由佢可取嘅地方，有野要讚下：✅叉燒燒得好靚，香口又大份。✅難得可以配瀨粉，而且唔會碎濕濕。✅非一般的例湯，有心機煲好好飲又足料。✅價錢合理，單拼最平五十幾蚊算係咁。…查看更多

大家見面大家食，最近大家食J悄悄換上新餐牌和新碗，又係時候嚟encore自選百搭麵配一餸只是$35起，尤其在晚市時段可說是抗通脹之選。可選配餸多達30多款，選擇困難下叫左「魚腐蕃茄蛋湯底手攪面」($39)蕃茄蛋湯一如以往超足料，有一件又一件嘅大蕃茄肉和蛋花，唔係平時一般餐廳的茄湯只有蕃茄衣。隨湯底仲有紅蘿蔔粒和粟米粒，似健康的住家餐。手攪麵係自家製麵條，方形麵條較米線掛湯，比米線淋少少，易咬得黎又有少少彈牙。魚腐都好大方畀夠五粒，值得一讚大家食嘅魚腐係實心，唔會好似咬空氣咁。食到飽一飽，下次又黎大家食面見大家。…查看更多

是夜因為睇舞台劇少有地去上環，6點幾都無咩idea食乜嘅時候就決定鐘入去呢間「熊拉麵」試試！雖然時間尚早，但店內剩餘空位已不多，可見生意不錯。「超級巨熊拉麵」個人口味揀廚師推介，覺得畢竟叉燒、麵款、麵硬度之間嘅最佳配合只有廚師最了解！先飲啖湯係幾好，麵身有咬口。1火炙肥叉燒+3梅頭瘦叉燒嘅配搭高質，蛋都算唔錯，荀就合格水平，整碗拉麵來計都算中上品。飲晒碗湯嘅小驚喜係會見到可愛嘅熊啤啤圖案係碗底！「熊自家製餃子」雖然心有啲怕食唔晒，但係都叫咗哈哈。一食落口果然無叫錯！皮薄、肉汁多、脆邊！令到我即使已經飽飽地都忍唔住一舊接一舊食埋佢！最後一定要讚讚枱面上免費俾客人任食嘅辣芽菜相當高質！！非常爽口之餘，仲索咗大量惹味辣汁！好食到明明唔食得辣嘅我都食唔停口！非常欣賞店家連呢啲細節都咁有心，值得一讚！…查看更多

一向鍾情食海鮮，可能因為細細個去酒樓通常有龍蝦伊麵食，變左依家係芸芸海鮮入面特別鍾意龍蝦！可惜銅鑼灣店已結業，其實中環店對我來講真係唔多就腳，平時又唔會順路經過。所以呢日係為咗龍蝦而專程過海嚟的！思前想後結果叫咗一份「龍蝦包」、一份「蟹包」，加一支Bless蘋果茶。首先講講自己偏好嘅「龍蝦包」先～ 未食已經好大陣香味飄過嚟，龍蝦肉亦毫不吝嗇塞滿晒個包最欣賞調味混埋牛油同檸檬汁，令個包香上加香，水準依舊！至於「蟹包」都發揮出色，但始終蟹肉好碎，口感一定會差少少。兩個包都好好食！不過建議龍蝦控想要啖啖肉，最好叫「Double Lobster Roll」就一定最滿足！…查看更多

自從有次lunch同一班同事來食過，就對呢間鉄火堂念念不忘，一直四圍放毒引朋友一齊再去食。是夜係尖沙咀毫無頭緒諗唔到食乜好，男友突然提議食鉄火堂，當然即刻附和！其實對鉄火堂咁有好感，係因為佢嘅壽司醋飯哈哈！「海膽碎蔥吞拿魚丼」($118)揀來揀去，結果要咗較相宜嘅呢碗丼，貪入面啲吞拿魚碎好撈飯，易有種食極唔完嘅錯覺，我仲加$5轉冬菇(碎)壽司醋飯更惹味添。 韓國海膽、三文魚籽、吞拿魚碎當然唔可以講超級靚嘢／超級鮮味，但全部都係水準以上，以呢個價錢真係收貨有餘！吞拿魚碎份量超多，啱啱開始食個陣幾驚整跌到一枱都係～「五式厚切藍鰭吞拿魚丼」(7:30pm前入座優惠價$150；原價$268)呢一碗就係男友叫嘅，仲加$5轉黑胡椒三文魚白飯。我淨係痴左少少，呢隻飯味道原來好似Pexxer Lunch個種咁好搞笑！藍鰭吞拿魚全部都係靚位，好快俾男友掃清光，仲大叫高質要再嚟過！證明我無介紹錯…查看更多

次次係尖沙咀行街時經過炉端金，都會俾餐廳門口充滿日本風情嘅裝修吸引住目光。終於搵到生日飯嘅機會，可以入去食放題兼八卦下內裡環境喇！食放題當然係有理無理一坐低先劃好一置刺身紙俾店員啦，準備變身成焚化爐！叫咗三文魚、帶子、甜蝦、蜜汁飽片、赤貝、八爪魚、吞拿魚等一大堆刺身，仲有蟹腳。食勻晒之後，發現......居然無樣嘢好食，唔新鮮無味還好，無諗到有啲刺身食落仲有陣雪味，都幾倒胃口。咁就試埋熟食可能會無咁差，話晒燒肉有調味料，應該無咁惡頂。之後嚟左雞翼、一口牛柳粒、厚切五花腩、七味雞翼等等，係就係好啲唔洗捱雪味，不過亦食唔出肉味。一句講晒就係死咸後尾店員都盡責咁早兩個字嚟提你執嘢走都幾掃興，明明個時都食到七七八八唔似想有排坐，同埋佢完全唔記得幫我地雪緊個生日蛋糕其實都未拎出嚟添。環境係裝修得幾靚，但唔好期望過高，以為會有個種祭典熱熱鬧鬧嘅feel。仲有要提提佢張梳化塊皮爛左好大撻，夏天著短褲嚟坐住度卡住大脾真係好唔舒服，唯有坐對面位避開。呢間真係無下次，旺角有太多間平過佢，質素又好過佢（要好過呢間一啲都唔難）嘅放題，只為裝修而嚟根本唔值得。…查看更多

話說家中大廚罷煮，屋企又無儲糧，懶起上嚟唯有付出代價叫貴貴外賣。其實袋鼠某啲餐廳可能因抽佣關係，外賣既價錢係比堂食貴好多！就講呢份「最掂叉燒瀨粉」袋鼠價$49，堂食價$40；而「果醬甜酸齌」袋鼠價$28，堂食價$18，食物份量仲比起外賣自取既少。至於講番食物味道的確有如餐廳霸氣名稱一樣「掂」，毫無失威！「最掂叉燒瀨粉」叉燒唔會好肥，但又做到保留油香，即使唔食肥膏都唔需要避得咁辛苦。瀨粉夠滑夠香，雖然客人應該多數叫燒味都係跟飯，不過瀨粉都無揸流灘。魔鬼在細節，食碟頭嘢最怕遇到又老又多渣嘅嚡烚烚配菜，好彩餐廳同樣無為慳成本而影響食物整體。「果醬甜酸齌」其實係為叫滿袋鼠最低外送額$85先搭單要的，個名怪怪地，但食落好正常仲幾好味添。嗯......不過一兜仔要$28就下次不了嚕。…查看更多

多年前曾有一股冷麵熱潮，通常可選擇的小食只有獅子狗、墨魚仔、中華沙律等，多數光顧只為便宜又飽肚，故出來社會後都甚少再食冷麵。回到正題，bookmark冷面貓呢間小店最主要係衝住虎蝦而來。因為餸可全部要晒虎蝦！要知道係泰式餐廳叫虎蝦刺身的話價錢一定貴得多，於是冷面貓便幫了個大忙，滿足了我的虎蝦癮！虎蝦的貨色也相當對得起價錢，可以肯定說口感絕對唔霉的。冷面汁份量好足同唔係死咸，食後沒有好口渴，不用狂飲水。加上紫菜碎口感豐富了點，吃得更滿足。除此之外仲叫咗店主媽媽的「手作鹵水鵪鶉蛋」唔記得影相，味道都十分入味又有蛋香，下次可以encore！總結是算有誠意和心思的小店，較同類型冷麵店突出和有記憶點。香港地生意難做，店主加油！…查看更多

慕名嚟到高質小店，可惜原來最想試既龍蝦湯已經無賣。唯有退而求其次叫咗個「紅酒燉牛肋條set」($88)📌意大利雜菜湯📌主打賣湯既果然唔係行貨，食材係靚嘢，就算煲完菜味都特別鮮甜，連湯渣都唔可以放過。😎. 📌紅酒燉牛肋條📌係好啱OL個種無乜筋同肥膏既位，煮到好淋，一啲都唔柴唔鞋口，汁仲多到成碗飯都唔夠撈。😍 紅蘿蔔竟然無我好討厭既草腥味，全部KO晒雖然價錢略貴，但好好味道，而且食得出用料真係高質！有時豪小小對自己好啲係開心嘅！…查看更多

企係門口等waiter帶位，一望睇到最少三張空枱，不過唔知點解企左陣都無人理。。。其實有個中年女經理一直同最近門口個枱既客人傾計傾得幾開心，但係等極其他waiter都無視我地~ 我就同個中年女經理講句"唔該我地兩位"，點知佢居然睥左我地一下，再遞起隻手示意我stop 然後又繼續同個枱客有講有笑無視我地，我地都費時阻住個女經理傾計走喇。。。第一次遇到服務態度咁差既餐廳，未食飯就要受氣，真係好無奈。。。對意粉屋印象差左好多…查看更多