miffyhk123的個人專頁

中環有好多食日本拉麵嘅舖頭，今日去左荷李活道花丸軒食日本拉麵，睇地圖好似離中環地鐵站好遠咁，原來坐電梯上去好快就到。有冇諗過食碗拉麵都開運呢？！紫菜上面竟然有開運兩個字，真係好日本呀！招牌原條慢煮豬軟骨拉麵配溏心蛋，慢煮8小時的豬軟骨真係好腍同入味，有入口即溶嘅感覺，原條豬軟骨真係第一次食，個湯又香濃，果然係招牌菜，仲有個溏心蛋都好正。叉燒魚介豚骨湯底沾麵當然不能錯過，充滿炙燒味的叉燒😋真心覺得好好味，啲麵都好彈牙。天婦羅紫菜魷魚鬚口感一啲都唔油膩，新鮮炸起外層好鬆脆。…查看更多

鰂魚涌最近新開了一間越菜餐廳越之廚正宗越式餐廳，老闆小時候住在越南，後來移居香港，所以懂得正宗傳統越菜，晚上6:30去到唔係太多人，不過一到食飯時間就差不多坐滿。海鮮蟹膏檳榔葉豬肉卷湯檬，好大碗真材實料，淨係睇個樣已經夠晒份量，蟹膏湯底第一次食，充滿香濃嘅蟹膏味，配上檳榔葉豬肉卷好有特色。火車頭湯河，個湯底冇味精，非常鮮甜，牛肉大塊好嫩滑又好多，加個小食沙嗲串，個豬真正外脆內軟，夠晒入味。米紙卷之戀，份量十足，又有牛油果，夠曬健康。咁多款小食，單叫又食吾曬，叫個越之廚小食拼盤最啱，𥚃面有越南春卷、牛油雞翼、蒸粉包、墨魚餅，雞翼外層真係脆卜卜。熱香茅蜜糖茶，滋潤蜜糖秋天最好適合。…查看更多

既然係去懷舊餐廳，咁一定要食懷舊鐵板餐，無論係豬牛羊魚雞都有齊，總有一款啱你。我就要左頂級 PRIME 肉眼半扒鐵板餐，配蒜蓉汁，好大塊牛扒🥩肉質好嫩滑又淋，蒜蓉汁配意粉一流，呢個套餐性價比好高，配餐湯及多士及咖啡或茶，仲有甜品懷舊咕喱😋啫喱入面仲有雜果，仲可以加淡奶，而且套餐係免加一添。原片菠蘿厚豬扒鐵板餮，巨型豬扒啲肉都淋，配咗燒汁，不過都係覺得蒜蓉汁好味啲，配咗個薯蓉，薯蓉得都好多，就算好大食都唔會唔夠飽。如果平日星期一至五可以免費升級特飲，好抵呀，不過我星期六都可以+$8升級特飲，但其實奶茶香濃質素都唔錯。…查看更多

上網見到大家樂葡撻感謝祭＄40 有 6件葡撻，限時優惠由11月18日至12月1日，11點後供應，售完即止，任揀6件一哥QQ葡撻/葡式蛋撻！可以選葡撻/Q版葡撻包括一哥QQ葡撻（焗豬扒飯版）或一哥QQ葡撻（豬仔版）😆見到個樣好搞笑，所以買來食吓，可能未到下午茶時段啲蛋撻就唔係熱辣辣出嚟，所以覺得冇咗香噴噴嗰種感覺，但打卡就夠晒可愛。隻豬仔就好甜，唔知如果唔夠熱放入焗爐會唔會溶咗呢？😂如果唔係買六件咁多，好似有茶餐都有呢個葡撻送。…查看更多

今晚同朋友慶祝生日，佢最鍾意食甜品，專登帶佢去旺角呢間甜品店食晚飯，又可以食精緻嘅甜品，又可以食埋晚飯唔使周圍走，一舉兩得。旺角甜牙牙除咗有甜品食之外，最近仲有二人龍蝦套餐，前菜先嚟一人一隻汁煮鮑魚，非常入味，仲切開一片片超級細心。呢個小食除咗鮑魚之外，其實仲可以揀其他小食例如牛仔粒沙律菜等等，選擇都幾多。主菜揀咗芝士烤龍蝦，面層舖上香濃的芝士夠晒香，芝士配龍蝦永遠都覺得係絕配。番茄大蝦面，雖然配料好似好普通咁，但係個意粉好好食，啲汁煮到剛剛好，一啲都唔普通。之後就係甜品，揀咗個拿破侖配Tiramisu加埋個抹茶雪糕🍦呢一餐真係大滿足😋…查看更多

佐敦原來有間傳統老牌川菜餐廳老川皇，裝修懷舊有特色，有時傳統老店D野係幾大份又抵食，呢度都可以用手機自助點菜夠方便👍見隔離台個個都叫酸菜魚，當然我都要叫返個金湯酸菜海鱸魚，好大盤，魚片又多又嫩滑，味道要左小辣都好惹味，啲酸菜仲好好味添。紅燒茄子夠晒鑊氣，茄子入味。農家小炒肉同茄子一樣鑊氣十足，肉片量多，我仲好鍾意食入面配料爽脆嘅青椒。飲品叫左傳統嘅酸梅湯及罐裝王老吉，覺得食辣嘢係要配呢啲飲品😆…查看更多

突然想食點心，又唔想去酒樓咁貴，就可以選擇嚟中環呢間一點心，唔使加一服務費，簡簡單單專注食點心。啲點心出嚟都係熱辣辣，種類選擇都唔少，有傳統嘅懷舊雞包仔，好多酒樓都未必有，仲有好耐冇食過嘅叉燒焗餐包、酸甜炸雲吞。蝦餃燒賣就可以兩隻兩隻叫，都好方便一兩個人去食，蟹黃蒸燒賣都算大粒、鮮蝦滑腸粉、潮州蒸粉果、四保滑雞扎幾足料，仲叫咗甜品香滑奶皇包、精製馬拉糕。其實佢仲有蒸飯、湯，除咗堂食仲可以外賣，堂食都有紙碟同筷子，不過店舖唔大，如果外賣返公司食都方便。…查看更多

今日經過新蒲崗，就去一間小店好運泰國美食，朋友話呢度嘅燒烤都燒得唔錯，店舖嘅裝修都有D特色，餐桌側邊有個大魚缸，裏面都有幾條大魚，令我諗起海洋公園對住鯊魚食飯嘅餐廳。下午茶時間所以叫咗一堆追加小食，雞肉、豬肉、牛肉串燒就當然要叫嚟食吓，即叫即燒，新鮮熱辣辣上枱，啲肉都幾嫩，我最鍾意食佢吃佢嘅雞串，蝦餅都唔錯，幾好食，青木瓜沙律就好似同平時嗰啲口味有啲唔同，裏面就有好多蝦米仔。另外都叫咗個午餐喇沙摻摻，配多個紅豆冰，呢個下午茶都算幾豐富。…查看更多

突然間想食鐵板燒，又想食放題，最後同朋友去咗觀塘廣場校長燒肉日韓料理，就可以滿足兩個願望。今次揀咗食足3小時，除咗可以慢慢食之外，仲因為升級可以無限追加食品包含燒烤、刺身、壽司、火鍋、啤酒、甜品、特色飲品。最不可思議嘅係打卡仲有免費升級任食日本北海道A4黑毛和牛、和牛肋條、日本米豚腩，仲有美國頂級手切牛，淨係食呢啲嘢嘅回本！因為天氣太熱，今次主打食雪糕🍦同特色飲品🍸，食燒烤生啤當然都唔少得，其中升級有酒精飲料蘋果酒草莓芒果沙冰好好飲，超級大杯，上面成支蘋果酒，打卡必選。雪糕都好多選擇，俾我搵到個開心果Häagen-Dazs！Dreyers士多啤梨雪條個脆皮好好食，當然維記芝麻糯米糍都係我嘅至愛🤭今餐簡直係大滿足😋…查看更多

原來新蒲崗有個室內釣蝦場HABO，坐地鐵去到鑽石山行過去都唔係好遠，位置算係幾方便。望落去都幾大，場內有2個大型釣蝦池，當日都見有情侶、一家大細去玩，連小朋友都釣到，好適合炎熱夏天的一個室內小玩意。所有釣獲可以選擇直接取走或現場烹調，可以烹調不同口味及有精選美味小食，其中食咗個炸薯條真係幾好食。不過就係釣到的蝦唔多，所以唔係好夠食。在場的職員仲會不時給每位初學者傳授基本的釣蝦技巧，唔怕完全釣唔到。…查看更多

好多朋友都因為日本地震唔敢去日本，冇得去嘅就喺香港食啦😂今日就去咗灣仔家賀屋刺身寿司專門店食飯。本鮪壽司5點盛做緊特價，喜歡鮪魚當然不能錯過，鮪魚🍣夠肥美，包括火炙大本鮪魚腩、極上本鮪魚餃、中本鮪魚腩、本鮪赤身醬油漬、蔥本鮪魚腩軍艦，再加埋鹽燒本鮪魚下顎，夠曬份量。怕五件吾夠食，叫多個彩虹壽司卷，有帶子、三文魚等，樣樣有D。食壽司之餘，炸物都要食啲，吉列海蝦同吉列三元豚當然不能少，外脆內軟，完全冇油膩嘅感覺。食完炸物，食返個軟綿綿又熱的自家低糖玉子燒，真係冇平時嗰D咁甜。雞爽肉串夠曬入味又juicy; 清酒牛油煮蜆，好香牛油味；蒲燒山椒鰻魚丼一人份量都好大碗，鰻魚又大塊。最後甜係好吸引的北海道千層雲呢拿蛋糕，甜度適中，D cream 好滑，再加個椰子雪葩真係透心涼。剛剛先知原來生日叫甜品可以畫畫㗎，下次都要搵機會畫一幅。…查看更多

朋友講話連發哥都去排隊幫襯的米芝蓮推介人氣店暖心芝作，今日趁住經過荃灣都去買嚟食吓，除咗芝麻卷，仲有石磨芝麻糊，同芝麻雪糕。聽講係每日手工限量製作，用石磨芝麻糊搭配純正馬蹄粉，蒸製後再卷出菲林形狀，係久違咗嘅芝麻卷，芝麻味香濃又彈牙，真係幾好食嘅，又唔會覺得好甜，上面仲要有啲芝麻，不過就嫌太細卷，一個人一陣就食晒一盒😋今日趕時間，淨係買咗芝麻卷，下次有機會再食埋個芝麻糊同埋芝麻雪糕🍦聽講都幾好食。…查看更多

依家就算唔去日本，都可以享受到日本嘅美食，今日就去咗銅鑼灣重房享受一餐與別不同嘅Omakase。首先頭盤是沖繩特產水雲配上清甜北海道蟹肉，哈哈螺好鮮甜，蘿蔔比較濃味，最後食就最啱。酸酸甜甜嘅醋混合口感有點似秋葵的順菜，配上爽口的象拔蚌，即刻開胃晒!接着就係令人期待嘅主食，首先牡丹蝦配蛋黃醬，全隻蝦炸到脆卜卜，連蝦頭都可以食埋，配上香濃嘅蝦膏，味道令人回味無窮。來自北海道肥美嘅蠔配上酸醋啫喱，真係連我呢個平時好少食蠔嘅人都愛上了它，再配上紫蘇葉，簡直好似一幅畫咁。白國鱒又名鱒魚，屬於油份比較重的魚，肉質軟綿綿，口感特別好味😋洋蔥絲配上醬油漬鰤魚，將味道提升到另一個層次。黃蘿蔔加入鮟鱇魚乾，再配上法包非常好味，加上睇到廚師將蘿蔔切粒嘅過程，真係好似一場表演咁。火炙後的拖羅變得軟綿綿，入口即溶，再用菜包住一齊食好有創意；而拖羅刺身魚味濃郁，兩種口感完全不同。要數色香味俱全就一定係魔鬼魚鰭天婦羅，配上健康素菜汁造出特別嘅效果，好似仙境咁。之後仲有吞拿魚北寄貝壽司；而上層海膽、下層拖羅蓉手卷，食完令人非常滿足。最後仲有非常鮮甜嘅魚湯，同巨峰提子🍇爲今晚美食之旅畫上句號。…查看更多

今日晚上同朋友去了灣仔盛記酒家食晚飯，第一次嚟，覺得這是一家傳統酒家，小菜份量多，香味十足，夠晒鑊氣。叫咗兩隻新鮮海鮮大聖子皇（兩隻起叫），同朋友一人一隻，新鮮肥美又鮮甜，蒜蓉粉絲入晒味，真係想食埋朋友嗰隻，店員仲好好招呼，幫我哋拆肉上碟，真係酒店嘅服務，酒家嘅價錢。冷盤沙薑豬手粒，啖啖肉嘅豬手，沙薑夠晒入味，冇骨非常吸引。主菜鹹魚雞粒豆腐煲，送飯真係一流，嚟到個煲都仲係熱辣辣啲油仲係跳緊㗎，最鍾意食呢啲新鮮滾熱辣嘅小菜，除咗雞粒嫩滑仲有冬菇，加埋啲鹹魚真係好好食。…查看更多

今晚同朋友去咗銅鑼灣家賀屋食晚飯，朋友話呢間餐廳夜晚都好多人幫襯，所以我都好期待。首先嚟個特選刺身盛-時令鮮魚附，多款新鮮魚生刺身包括三文魚、油甘魚、超大隻赤海蝦等，又肥美又鮮甜。海膽龍珠卷，海膽加上本鮪魚腩蓉，再配醬油漬蛋黃，口感豐富。西京燒熟成黑豚腩肉，西京味噌醃製，黑豚腩肉夠晒肥美，燒到外脆內軟。月見櫻花海老丼定食，有一個蒸蛋、沙律菜、烏冬、味噌湯、同最重要嘅櫻花海老丼，將蛋黃汁加入飯，再配上海老更加好味。吉列芝心豬扒配椰菜絲和芝麻醬汁，豬扒炸到剛剛好，而且夠晒份量，脆卜卜仲有拉絲嘅芝士，一定要趁熱食先有拉絲嘅效果。鹽燒鰝鰺魚頭鮫，我都好鍾意食魚頭鮫，貪佢肉質嫩滑，啖啖肉。鹽燒半切雞皮餃子串，雞皮做餃子皮又幾特別，又唔覺得肥喎。第一次飲柚子檸檬酒，味道酸酸甜甜原來好好飲；蜜桃碳酸酒都唔錯。…查看更多