FoodieKwanHK的個人專頁

最近出街食飯,都會湧現食飯後甜品既想法。今次係長沙灣食完飯,見時間尚早,就同細佬邊散步邊搵甜品食。行左接近20分鐘,終於到目的地,主要就係想試下佢既炸雪糕飛碟!大概等十分鐘就有得食。炸麵包夾住芒果同雪糕,外面層麵包仲係熱,而裡面既雪糕就凍冰冰,少少熔,表面仲淋左焦糖漿,賣相已經相當吸引!!由於驚d雪糕熔,相機都食得快過人,之後就進入試食環節。一口咬落去,先係焦糖糖漿既焦香同甜味,再到香脆溫熱既麵包,之後係酸甜既芒果,最後到冰涼既雪糕!一口就有齊冷熱酸甜既感覺!絕對比想像中好食好多!同細佬一人半份,三扒兩撥就食完!好味!!絕對係值得一試既甜品!而且仲要襯熱(凍)食!除左芒果,另外仲有榴槤味,有機會可以試下!炸芒果雪糕飛碟 $41…查看更多

約左朋友一行5人係九龍城食泰國菜,餐廳安排左間房俾我地,叫左6個餸,逐樣講下。生蝦刺身|食泰國野必點,好味。冬蔭公湯|酸酸辣辣非常惹味,濃郁又足料!係依餐既MVP!馬拉盞炒通菜|依餐最受歡迎菜色,通菜無渣,炒得好香,獲得一致好評。咖哩蟹法包軟殼蟹|咖哩幾香,軟殼蟹炸得酥脆,法包外脆內軟,尤其是法包,沾左咖哩好好味!三樣食材亦相輔相成,唔錯!夜市火山骨|似煲湯排骨,但保持到腍既狀態,唔柴口,幾香肉味。不過睇相可以堆好高,送到黎係訓低哂,視角效果欠奉。豬肉碎生菜包|肉碎小辣,配合爽脆生菜,正!只係送黎有一半肉碎比生菜遮住,大家就住就住咁包肉碎,最後先發現仲有大量肉碎係下面XD整體黎講,好味!QR code落單,可以清晰落要咩辣度,每人叫左杯飲品,平均$240左右,小貴。生蝦刺身 $128冬蔭公湯 $148馬拉盞炒通菜 $108咖哩蟹法包軟殼蟹 $198夜市火山骨 $198豬肉碎生菜包 $118…查看更多

今日專程去到大角咀,為左試依間開左超過十年既拉麵店!佢地主打正宗北海道味噌湯拉麵,而且麵條都係日本直送!豚骨拉麵平時就食得多,味噌湯拉麵對我而言,屬於少接觸既種類,所以特別期待!鋪面不大,前店後廚既設計,牆上貼有十幾年黎相關報道,亦有好多黎挑戰地獄拉麵成功既照片,難得有餐廳無放音樂,可以靜靜用餐,成個氣氛都好舒服。同細佬分別一人叫左一份晚餐套餐(拉麵+小食/飯+汽水),我揀左叉燒拉麵,細佬叫左招牌牛油拉麵,小食叫左串燒雞軟骨&自家製餃子Share。等上菜期間,餐廳送左一份薯仔蛋沙律俾我地試下,睇賣相已經知正!果然不出所料,薯仔同蛋既組合真係無得輸,味道同份量都岩岩好,作為前菜非常適合。兩碗拉麵接續送上,不及待先試了一口湯,味噌湯濃郁厚重,鹹香風味十足,又唔會覺得油膩。重點係叉燒!我碗叉燒拉麵一共有四塊厚切叉燒!真係多得驚人!!而且每塊都好大塊,加上肥瘦適中,令每一口咬落去都有被填滿既感覺,超滿足。日本直送既麵條,軟硬適中而且彈牙爽口,掛湯亦無問題!可能會有人覺得湯底咁濃,叉燒又厚實,會好易膩,但因為依碗拉麵有提供大量蔥花,當食到有少少膩既時候,連埋d蔥一齊食,會起到清爽解膩既作用。小食方面,雞軟骨超香口,餃子更有驚喜!雖然有少少焦左d,但係餡料內有乾坤,佢地既餃子餡有好重既蒜香味!鍾意食蒜真係要試下!整體黎講,雖然大角咀對我黎講唔算太就腳,但一碗濃湯,四塊厚叉燒,加上人情味滿分,已然足夠列入我既拉麵清單!支持開心經營既小店,保持匠心,繼續加油!招牌牛油拉麵+串燒雞軟骨 $150叉燒拉麵+自家製餃子 $150…查看更多

屋企附近新開左一排既星馬菜餐廳,放假同細佬去試下岩唔岩食。星期六既午市時間去係需要排隊,大概5-10分鐘左右有位。叫得星馬菜餐廳,香茅類既菜式有好多。不過今次想試左星馬雞飯,即海南雞飯先。跟餐可以揀雞湯/肉骨茶,我就揀左肉骨茶,另外叫左一份咖央多士。不出意外,咖央多士係最先送黎,味道就係平常食到既咖央多士,好味但唔特別。無骨既海南雞就係正!雖然係雞胸,都唔會太柴口,配合3種醬汁同油飯一齊食,都幾好食。我會鍾意沾黑豉油多D,甜甜地。反而跟餐既個碗肉骨茶幾好味,藥材同香料味都好足,但又唔會太濃烈,排骨既肉又香,係油左少少,不過係好食既!整體黎講,以依個價錢食到既海南雞飯算係好食,但同咖央多士一樣,真係無乜特別。肉骨茶反而係高光,不過跟餐就細碗D,下次再食應該會試下香芽豬扒飯/喇沙。招牌星馬雞飯(配迷你肉骨茶) $68咖央多士 $26…查看更多

出開觀塘買羽毛球,於是又係駱駝漆搵野食,聽講係屯門好出名,見觀塘有開就去試。本身唔食得太辣(譚仔10小既程度),所以叫左碗小麻辣米線試下水溫,餸揀左豬頸肉+香茅雞扒,餐飲係凍檸茶。原先仲以為叫兩樣餸會唔夠食,點知送到黎係堆到成碗都係!淨係視覺都有夠衝擊。米線硬度適中,小麻辣湯對我黎講都唔算辣,下次可以辣一級。豬頸肉同香芽雞扒份量多,性價比超高。切得咁細既豬頸肉仲以為會無乜咬口,但其實香口得黎仲可以沾多d湯汁,都幾好。香芽雞扒油香四溢,都好惹味,杯凍檸茶都少有地好大杯!!整體黎講食左一碗肉落肚,非常滿足!而且咁大碗Total都只係$73,好抵食!不過我係中午飯點去食,所以都幾多人,要搭枱,令我依個I人唔係好敢係咁影OrzP.S. 只收現金!豬頸肉小麻辣米線 $56+香茅雞扒 $14凍檸茶 $3…查看更多

送左塊羽毛球拍去穿線之後,去到冠力工業大廈搵食。叫左份大連鮑魚粉絲蒸肉餅,有送湯＆時菜一碟。坐低無耐 菜,湯,時菜已隨即奉上,份肉餅送到我呆一呆😯兩隻鮑魚既size超出左的預料😂反而肉餅薄左少少,不過淨係食鮑魚都抵左!!整體好味道,而且都夠飽👍等緊期間,望下其他人叫咩食👀發現好多人都食魚🐟蒸倉魚,油封黃花魚等等!後尾先知原來依度出名食海鮮。餐廳好有屋企感覺,似食緊住家飯咁,下次黎食可以試下佢啲魚!!睇隔離台條煎封黃花魚好吸引🤤大連鮑魚粉絲蒸肉餅 $67…查看更多

朋友告知,灣仔拉麵有雙龍雙虎鳥華亭,今次先試其中一龍🧐平時經過都見到排哂隊咁,所以都早左15分鐘去。結果都已經有10個人左右排緊隊😮再遲啲真係未必食到第一輪。落單期間,聽到隔離話follow @kokuryuramen_wanchai ,就有1件唐揚炸雞送,果斷follow🤣第一次食,order左基本款 - 黑龍豚骨拉麵(一倍辣)。以我食既濃淡標準,豚骨湯頭濃郁得黎唔算太咸。麵條軟硬適中,而且彈牙。叉燒軟嫩不柴口,肥瘦適中,其他配菜有荀,紫菜,蔥同洋蔥,食哂成碗都唔會膩😋食拉麵我多數都會叫埋餃子,所以叫左一份雞皮餃子同一份餃子配啤酒。佢地既餃子都係即叫即整,雞皮餃子好香,拿拿影完相即刻食,爭啲辣親😅滿口雞油香,正👍餃子就差唔多食哂碗麵先整好,都好食,不過就唔太特別。整體黎講,拉麵好食,上菜速度快,我都食得快,所以用餐時間都唔夠半個鐘🤣下次再試另外幾間灣仔拉麵店😤黑龍豚骨拉麵 $98SUNTORY生啤+餃子 $98雞皮餃子 $38…查看更多

今次去銅鑼灣搵食。第一次去餐廳坐低未落單,就已經有碗忌廉湯飲😂我叫左芝士吉列炸豬排配飯。就黎滿瀉既Mozzarella芝士,極邪惡😈豬排嫩口,配濃郁既芝士好好味。有提供咖哩汁同鹽沾黎食,兩款都好味😋配菜有青瓜,小黃瓜,都幾開胃,一小碗韓式辣醬年糕魚糕,唔會太辣。細佬揀左吉列雞排配烏冬。其實係雞柳但唔會太柴,食左兩條,都幾好味。烏冬偏普通,不過碗入面都仲有其他配料,份量略為偏細。整體黎講炸物同配菜都好味,但係飯同烏冬份量偏少,食哂啲配菜,我覺得岩岩好,細佬就少少唔夠。芝士吉列炸豬排 配飯 $158吉列雞排 配烏冬(+$10) $128…查看更多

之前去過英國食過Fish & Chips,返到香港搵間比較下。係英國食,魚肉係種類上係有優勢,除左鱈魚,仲有黑線鱈,鱸魚等等,唔同魚肉質地會分別。依間店就得4oz同8oz鱈魚,不過配菜除左薯條,仲可以揀配雞肉意粉,睇相都幾吸引。鱈魚份量好足,味就都係個個味,炸漿唔會太厚,岩岩好。英國會有啲醬/調味料擺台面,可以按口味落,依間就配他他醬。佢地係粗身少少既薯條。魚同薯條都係岩岩炸起,趁熱食好正!!除左炸魚薯條,佢地仲有賣幾款小食,例如雞蛋仔,炸燒賣同黃金雙皮奶卷。我就買左份雙皮奶雞蛋仔入戲院😋就好似係雞蛋仔入面有牛奶布甸咁,都幾特別。Fish and Chips $88雙皮奶雞蛋仔 "推廣期優惠價" $39…查看更多

今日出去觀塘拎返塊拍🏸又再出去搵野食!!今次甜品當飯食,因為預想個份量應該夠飽,叫左份邪惡既三重朱古力窩夫🍫🍫🍫🧇揀左個係廚房旁邊既位坐,佢地整緊窩夫個陣已經好香。果然不出所料,黎到既時候,成座塔咁高,視角效果滿分!食落個窩夫外脆內軟,即叫即整,所以仲足夠熱。朱古力味好濃,cream都好足夠,加上今日室外超熱,食埋個球朱古力雪糕,大滿足!!叫左一杯凍美式咖啡☕️平衡一下味覺,少飲咖啡既我覺得偏酸🤔其實依家餐廳仲有漢堡包都好吸引,甜品都仲有好多款,下次再黎試過!!三重朱古力窩夫 $98Iced Americano $42…查看更多

主要係想試梳乎厘班戟,個侍應拎出黎個陣搖住行過黎😂我地叫左吉士焦糖梳乎厘班㦸。梳乎厘好軟熟,焦糖燒得岩岩好,無苦味!意大利飯好creamy 同好香黑松露味,醋汁酸酸甜甜好開胃。今次個risotto係腍個種,我覺得普通,細佬就話好食。蒜香蟹肉意大利粉,都好好味,蒜香味好濃,蟹肉足夠多。加埋少少黃瓜仔平衡返,整體唔會太膩。兩杯沙冰就偏普通。整體黎講,每樣食物份量都偏多,兩兄弟咁叫,都覺得飽😂好彩無貪心叫多份薯條,隔離台叫左份薯條超大份😅,真係會食唔哂。小貴。吉士焦糖梳乎厘班戟 $108黑松露燴飯伴巴馬火腿配黑醋汁 $128蒜香蟹肉意大利粉 $138加配 Oreo忌廉沙冰 $23加配 芒果菠蘿沙冰 $24…查看更多

最近得知童年同細佬玩得不亦樂乎既電腦遊戲,小朋友齊打交2(LF2)同壽司郎合作,分別係坑口,啟德同尖沙咀設有主題店!於是約埋細佬一齊去抽卡…去食先真!晚飯時間等位依然要等好耐,足足50張台!雖然都有好多人唔等走左,但都等左起碼30分鐘先入到去。不過見到d熟悉既遊戲場景,回憶湧現!值得!!成間餐廳都有LF2既經典關卡場景同選擇角色的畫面。我到今日都仲記得D角色叫咩名同有咩技能!每張枱枱面就有遊戲畫面,輸送帶有時會有冰火佬同邪鬼開技既卡餅走過,都幾得意,LF2迷真係走唔甩!一定要去睇下!!依篇主要集中評論3款聯動食物,每款聯動食物都會附送不同贈品,而款式都係隨機。賭性好強,我已經做早要依好多碟既準備(講笑第一款係皇后島三文魚雙味(11月18日至12月1日),贈品係插牌,細細張印有角色造形,一共有14款。上菜既時候會直接靠係壽司旁邊,所以一睇就知抽到咩角色。味道就只係普通三文魚雙味,即一件生,一件炙燒。而12月2日起會換成大磡村鰻魚雙味,共叫左兩份,一張中忍者,另一張中冰火佬!開心!!第二款係Firzen極地吞拿魚火山。贈品係變幻收藏卡,即係光柵卡,換角度睇會有唔同畫面個種。上菜件壽司放係一張印有LF2遊戲視窗既膠卡上面,擺盤幾有心思,味道就見仁見智,吞拿魚都幾肥美,不過食得多會膩。收藏卡放係個碟下面,一共有7款。問我最想要,就一定係冰火佬個張!細佬由於唔多好生魚,所以先叫左1碟先!結果第一張中左既係邪鬼出緊化為烏有!好有型!!唔死心,又再追多碟!!再抽!第2張出左冰火佬!!!兩碟畢業!!冰佬同火佬合體之後出極地火山!! 抽到個下超級開心,仲叫埋出黎!!勁靚!!第三款係Louis EX衝光拳雙色芭菲,贈品係角色立牌,底座上印左角色名。抹茶+草莓既組合我就一般,好彩唔太大杯。第一階段有6款,12月2日起第二階段會再多7款!同細佬一人一杯,最後抽到Louis同火佬!。雖然唔中冰火佬,不過追唔到落去,好飽!!整體黎講,因為抽到冰火佬卡超開心!(被打。繼上次排球少年之後,今次係LF2又一次吸引左我去食,壽司郎一向食物質素都在水平上,佢地肯搞依類活動真係好有心,十卜十卜!!皇后島三文魚雙味 $19Firzen極地吞拿魚火山 $32Louis EX衝光拳雙色芭菲 $38…查看更多

去啟德試GoNuts,4個人叫左小食拼盤,意粉,漢堡同pizza,另外叫左兩款甜品。意粉係卷卷粉,質感有啲似通心粉,都幾得意。滿滿既菇菌,卷埋忌廉汁食幾好味,不過算細碟少少。小食拼盤特色係生炸口水雞,沾川椒麻辣醬食,少麻少辣又唔柴口。牛肉漢堡事先切開一半訓係鐵板,再淋熔左既芝士係面。咁食漢堡都幾方便只係個包浸得耐肉汁同芝士,淋左啲無咁脆,不過薯條反而好食左,真係兩睇。蒜香牛柳粒Pizza,沒有不好食的道理。嗜甜如我,兩款甜品都好滿意。麻薯窩夫外香甜內軟糯,千層塔鬆脆得黎帶絲絲甜味。整體黎講食物好味,只係我地揀既菜式無乜亮點。我個人覺得最好食係兩款甜品。如果再去會想試Risotto 同烤雞。白松露油忌廉野菌汁卷卷意粉 $102小食拼盤 $158芝士熔岩雙層手製牛肉漢堡 $158和風蒜香牛柳粒Pizza $153香蕉朱古力奶昔 $66三重朱古力麻薯窩夫 $82曲奇忌廉千層塔 $78…查看更多

餐廳係元州街,恒生銀行櫃員機隔離,有少少隱蔽,但有擺易拉架指路,都唔難搵。鋪面細細,日系設計風格,有好多動漫元素,例如海報和figure,播放既音樂大多是動漫歌曲,整體氣氛好舒服。我叫左A4.終極之廣島牡蠣濃湯拉麵,細佬就揀B8.極之黑松露鯛白湯拉麵,小食叫左雞皮餃子,叫拉麵有送甜品,Follow佢地IG送飲品!平時豬骨湯同雞白湯拉麵食得多,海鮮湯好少食,今次真係打開左我新味覺!!首先係湯底,非常鮮味,牡蠣濃湯非常濃郁純厚,但又唔會油膩或太咸,係可以整碗湯飲哂既程度!其次係配料,非常足料既一碗拉麵,大廣島蠔有3隻,叉燒有3塊!仲有好多蠔仔,蠔每隻都好肥美,慢煮叉燒風味十足。另一碗黑松露鯛白湯拉麵都好特別。店員介紹可以先試原味,再混合黑松露,會有唔同風味。鯛白湯非常鮮甜,而鯛魚肉都好嫩滑。雞皮餃子好脆好香口。至於甜品迷你紅豆大判燒,食落味道似豆沙鍋餅,不過厚身D,幾好味。杏仁奶凍就普通。整體黎講,依餐非常好味又滿足,價錢亦都好公道。打開左我味覺既新篇章,以後再試其他款。非常推薦鍾意海鮮湯或想嘗鮮既朋友去試!A4.終極之廣島牡蠣濃湯拉麵 $138B8.極之黑松露鯛白湯拉麵 $98雞皮餃子4件 $28P.S. 只收現金!! 逢星期一休息|午市1200-1500|晚市1730-2130…查看更多

突然想食漢堡,係澳南搵左間試魚柳漢堡,同細佬食午餐,包頭盤,主菜+飲品。頭盤揀左蘑菇湯&炸蟹肉球配沙律,湯幾濃郁,我試左少少都幾好味,炸蟹肉球得兩粒,沙律菜爽口。主菜係Fish & Chips同炸鱈魚柳漢堡,有唔同種類既魚可以揀。不過擔心食唔出分別,所以揀普通既藍鱈魚,拎左d試,魚肉結實鮮甜,粗薯條正常發揮。最期待既魚柳漢堡出場,同樣係鱈魚,我覺得依塊魚柳炸得好食啲,脆可口,配合醬汁好正。跟漢堡既幼薯條都炸得香脆。甜品係檸檬罌粟籽蛋糕,淋埋蜜糖,甜得黎鬆軟。整體黎講,終於食到魚柳大過包既魚柳包(笑。有機會可以試其他種類既魚,另外烤雞同意粉都好吸引。Fish & Chips(藍鱈魚) $98蘑菇湯 跟餐+$12炸鱈魚柳漢堡配薯條 $98炸蟹肉球配沙律 跟餐+$12檸檬罌粟籽蛋糕 跟餐+$25…查看更多