新武二廣潮福粉麵食館

營業中

休息中

要食好嘢唔一定要貴, 平嘢都有令你回味無窮嘅能力。 呢個蠔仔米粉, 我第一次同佢相遇, 係3年前, 拍攝飲食節目「澳門諸事喱」時, 喺佢間離嗰間「彿笑樓2」等開鏡, 於是, 襯有空檔即去隔離食個LUNCH。雖然只係十幾蚊, 不過D 蠔仔勁肥, 勁大隻, 而且非常鮮甜, 加埋湯底好味得嚟唔味精, 仲有炸蒜香, 香蔥同冬菜, 未食已經香味撲鼻。 如果係嗜辣嘅朋友, 就更加會愛上呢度嘅醃酸青尖椒。佢好酸, 好鬼酸, 不過佢亦好辣, 勁鬼辣。當2種味撞埋一齊, 哇~~~ 正呀!!! 你食過就會明白有幾好。 食尖椒時由個尖尖咬落去, 然後啜一下D 汁, 勁辣到舌尖有點發麻, 同時又有非常惹味嘅醋酸味, 口水直流...好正呀! 工作過後, 我一直都記住呢碗粉~~ 往後3年, 每次無論在公在私, 去到澳門我都一定會去呢度再食一次。識去嘅人唔多, 只有澳門人識去, 遊客只會當佢係流嘢, 但識食嘅就會當佢係寶~! 有機會就去試吓啦~~好嘢嚟架~~ 最好下午3點左右去, 一來份量細細可以當TEA食; 二來太早去到無蠔仔賣, 中午時間超多學生同上班族去, 所以都係3點後去最好。