旺角THE FOREST一樓轉角有間泰菜「青花」，餐廳嘅玻璃燈具加左綠色植物裝飾，唔同角落都有乾花同綠植，成個城市綠洲咁。餐廳仲有個半露天平台位，晚風輕吹，望住旺角夜景食泰菜，chill到唔捨得走！
白冬蔭公 - 南薑椰奶雞湯（小） $86
白冬蔭功一上枱就知唔簡單！湯底奶白似足泰北秘方，南薑香氣溫柔湧出，椰奶滑到似絲綢，但辣勁偷偷哋爬返上喉嚨～雞肉吸盡精華，飲完成個胃暖笠笠，個人私心推薦！
炭燒豬肉串燒沙嗲 $76
即叫即燒，炭火香衝鼻而來！豬肉邊位燒到微脆，咬落juicy到爆汁，點埋個濃稠花生醬，甜鹹交錯，食六串都嫌唔夠喉～
馬沙文香料牛肉咖喱 $128
主角馬沙文牛肉咖喱簡直係「咖喱界貴族」！香料磨到幼滑如絨，花生同椰奶嘅濃香滲曬入牛肉，入口即化！
泰式虎蝦金邊粉 $138
以酸香嘅新鮮羅望子汁炒泰式虎蝦金邊粉，炒到乾身又夠鑊氣。一般係泰國街頭吃到嘅都是中小型嘅蝦，呢度選用嘅虎蝦大隻到要分三口咬，滿足感爆燈！
蒜蓉炒椰菜 $68
炒椰菜簡單但蒜香爆棚，夠鑊氣又爽脆～ 成餐都係比較濃味嘅菜式，一定要叫返碟菜平衡下嘅。
計埋價錢，兩個人五百零蚊食到捧住個肚走，喺旺角呢個地段，絕對係抵食夾大件！臨走前見到隔籬枱嗌嘅芒果糯米飯都好吸引，已經mark定下次再嚟試～ 不過溫馨提示，平日晚飯時段幾乎必滿座，想唔使等就記得預約定先啦。
