Lunch冇tapas供應，不過有$68至$118不等嘅set lunch，包湯或沙律、茶或凍檸茶，可另外加錢要每日甜品、即磨咖啡及紅白酒。夜晚嘅tapas種類幾多，例如西班牙燒乳豬係$298、大嘅海鮮飯係$338... 當然要睇埋個份量啦😂 以呢度環境嚟睇，咁嘅價錢合理吖
南瓜湯
似加咗啲薯仔，所以口感唔算滑溜，但感覺好新鮮，南瓜甜度好天然，好好飲！
意大利菜沙律
加咗青瓜嘅沙律好清新，但係好酸..... 酸到罅埋口面😫 最後俾咗大口仔食，佢就好開心喇，最鍾意食酸野
紐西蘭西冷配香蒜燒汁 ($118)
一直以嚟我都係唔滿意嗰啲所謂嘅香蒜汁，得嗰少少蒜味你好意思叫自己做蒜汁？不過呢個香蒜燒汁的確有初戀嘅感覺！首先佢唔係用蒜蓉或蒜片，而係成粒成粒蒜頭！成個汁都有香濃嘅蒜味，而每粒蒜亦都充滿燒汁味道，雖然落單嗰陣已經要求多汁，但到食到咁上下嘅時候，要再加汁！牛扒我叫8成熟，不過end up熟咗啲，而且少韌，但好在肉味香濃，當然點埋個蒜汁係加咗好多分啦！薯條偏軟不過薯味夠，整體都好滿意亦都覺得抵食
燒羊架配薄荷黑胡椒汁 ($118)
叫菜後，大口仔好擔心份量唔夠，通常羊架都係較細，男仔嚟講未必夠食，但上菜後...... 好羶！！！！！一上菜，就算我坐對面都聞到好羶嘅味道...... 每切一吓我都忍唔住講一次，好羶呀！！中間有啲粉紅色，大口仔每啖都話好味，而且兩大舊份量足夠，開心死佢，食完之後佢話呢個羊架令佢嘅星期一變得美滿
服務
特別一提，服務非常好，就算上菜後我再要求要多啲多啲香蒜燒汁，個後生女店員都冇黑面或者敷衍我，佢係認真地將啲汁連好多蒜頭倒落一個碗仔度俾我，我食咁耐佢都係滿臉笑容咁招呼客人，值得大讚！
