Peko Peko Eatery (康怡廣場北座) (已結業)

太古城只有好少嘅西餐廳，特別係咖啡室類型，今次太耐冇嚟太古城發現有一間新開嘅咖啡室，除咗日頭飲咖啡之外，原來夜晚都有好豐富嘅西餐菜式。-今次同閨蜜二人，總共叫咗一個主菜、一個特色小菜、以及意粉乙份。首先未用餐之前，已經覺得環境氣氛都非常好，拱形門嘅二人卡位坐、裝修嘅顏色以木製及柔和嘅光線為主，所以感覺好有fine dine氣氛。-慢煮和風醬油八爪魚($168) - 上枱時八爪魚並得出，因為配菜都好多，例如有沙律、峴、青口、八爪魚粒等等。不過品嚐完個八爪魚之後，我覺得八爪魚真係好軟熟及入味，醬油精華都入晒喺八爪魚入面，食落去好軟身好容易入口，有少少似食鮑魚嘅感覺，值得推介呢味菜！-烤彩虹芝麻脆皮羊架($318) - 羊架落單嘅時候叫咗七成熟，羊架嘅味道唔會太騷，加埋特製嘅醬汁，同埋鮮嫩嘅羊肉質感，每一啖都好似慢煮過嘅一樣，又嫩又好食。上面嘅七色彩虹非常有趣，估唔到芝麻都有咁多顏色。-海膽竹炭烏冬 ($198)- 意粉嘅質感好有趣，加上醬汁都好搭配，食落去好滑又入味。加埋新鮮嘅海膽簡直係絕配，如果多少少配料就更加好，例如加洋蔥粒，令口感嘅層次更加豐富就最好啦。